ءماجىلىس بالالاردىڭ ءدىني شارالارعا قاتىسۋىن شەكتەيتىن قۇجاتتى قاراۋعا كىرىستى

استانا. قازاقپارات - پارلامەنت ءماجىلىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراۋعا كىرىستى، دەپ حابارلايدى قازاقپارات.

بۇگىن پالاتانىڭ جالپى وتىرىسىندا اتالعان زاڭ جوباسى بويىنشا جۇمىس ىستەپ، قورىتىندى ازىرلەۋ مىندەتى حالىقارالىق ىستەر، قورعانىس جانە قاۋىپسىزدىك كوميتەتىنە جۇكتەلدى.

«زاڭ جوباسى ءدىني قىزمەت سالاسىنداعى مەملەكەتتىك ورگانداردىڭ قىزمەتتەرىن ۇيلەستىرۋدى كۇشەيتۋ ماقساتىندا بۇل سالاداعى زاڭنامانى جەتىلدىرۋگە باعىتتالعان. سونىمەن قاتار زاڭ جوباسى ءدىندى دەسترۋكتيۆتى ماقساتتاردا پايدالانۋعا، كامەلەتكە تولماعان بالالاردى ءدىني قىزمەتكە ءارى ءدىني راسىمدەرگە، ءىس-شارالار مەن جينالىستارعا زاڭسىز تارتۋعا، ءدىني شارالار مەن ۋاعىزداۋدى زاڭسىز جۇرگىزۋگە جول بەرمەۋگە باعىتتالعان نورمالاردى قامتيدى. كوميتەت وسى زاڭ جوباسىن جۇمىسقا الۋعا جانە ول بويىنشا قورىتىندى ازىرلەۋگە دايىن»، - دەدى حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ماۋلەن اشىمبايەۆ.

ەستەرىڭىزگە سالا كەتەيىك، 2017-جىلدىڭ جەلتوقسانىندا قر ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن زاڭنامادا قاراستىرىلىپ وتىرعان تۇزەتۋلەر اياسىندا بالالار ءدىني عۇرىپتارعا، مەشىت پەن شىركەۋگە تەك ەرەسەكتەرمەن ەرىپ بارا الاتىنىن مالىمدەگەن بولاتىن.

«بۇل نورمادا مىندەتتى تۇردە ەرەسەك ادامداردىڭ ءبىرى بالانىڭ جانىندا بولۋى ەسكەرىلگەن. ناقتىراق ايتقاندا، اتا- انانىڭ ءبىرى، كامەلەتكە تولعان جاقىن تۋىستارى، ياعني اعالارى مەن اپكەلەرى، اتاسى مەن اجەسى، سونداي-اق زاڭدى وكىلدەرى بولۋى كەرەك. وسى ورايدا مىندەتتى تالاپتىڭ ءبىرى - ول اتا-انانىڭ ءبىرى قارسى بولماۋى ءتيىس»، - دەپ ءتۇسىندىردى ول تىلشىلەر ساۋالىنا جاۋاپ بەرۋ كەزىندە.

اۆتور:   رۋسلان عابباسوۆ