قاراعاندىلىق جەڭىل اتلەتتەر ازيانىڭ رەكوردىن جاڭارتتى

استانا. قازاقپارات - جەڭىل اتلەتيكادان وسكەمەندە ءوتىپ قازاقستان چەمپيوناتىندا قاراعاندىلىق سپورتشىلار ازيانىڭ رەكوردىن جاڭارتتى، دەپ حابارلايدى قازاقپارات ق ر جەڭىل اتلەتيكا فەدەراتسياسىنىڭ رەسمي سايتىنا سىلتەمە جاساپ.

وسكەمەندە ءوتىپ جاتقان قازاقستان چەمپيوناتىندا قاراعاندىنىڭ ەستافەتا قۇراماسى ازيانىڭ ۇزدىك ناتيجەسىن تىركەدى.

«نيكولاي بارسانوۆتان ءتالىم الاتىن ۆيتالي زەمس، ۆلاديسلاۆ گريگوريەۆ، ۆياچەسلاۆ زەمس، داۆيد ەفرەموۆ 4x200 مەترلىك ەستافەتاعا جۇگىرگەن بولاتىن. بۇل تورتتىك اتالعان قاشىقتىقتى 1:26:70 مينۋتتا جۇگىرىپ ءوتتى. ءسويتىپ، ازيانىڭ ۇزدىك كورسەتكىشىن ورناتتى. بۇعان دەيىنگى رەكورد جاپونيا قۇراماسىنا تيەسىلى ەدى. ولار 1991-جىلى 200 مەتردى 1:27.04 مينۋتتا كەسىپ وتكەن. قاراعاندىلىق اتلەتتەردىڭ وسى ناتيجەسىن ق ر جەڭىل اتلەتيكا فەدەراتسياسى ازيا جەڭىل اتلەتيكا قاۋىمداستىعىنا جىبەرەتىن بولادى»، - دەپ جازىلعان اقپارات كوزىندە.

ايتا كەتەتىن جايت، قازاقستان كۋبوگىمەن سالىستىرعاندا چەمپيوناتتا ەرلەر اراسىنداعى ەستافەتادا قاتىسۋشىلار سانى ارتقان. كۋبوكتا بار-جوعى 2 قۇراما ونەر كورسەتسە، بۇل جولى مەدال ءۇشىن 8 كوماندا تالاستى. ول كەزدە پاۆلودار سپورتشىلارى توپ جارعان ەدى، وسى جولى كەرەكۋلىكتەر ەكىنشى ورىنمەن شەكتەلدى. ۇزدىك ۇشتىكتى اقمولا وبلىسىنىڭ ەستافەتاشىلارى قورىتىندىلادى.

ايەلدەردەن ەكى كوماندا جارىس جولىنا شىقتى. الەكساندرا زاليۋبوۆسكايا، روكسانا وسپانوۆا، ۆەرونيكا بروسلاۆسكايا، ۆالەنتينا ستەپانكوۆسكايا باستاعان پاۆلودار قۇراماسى شىعىس قازاقستان قىزدارىنان جىلدام بولىپ شىقتى.

15- قاڭتار، وسكەمەن. جابىق كەشەندەگى قازاقستان چەمپيوناتى:

4x200 مەترلىك ەستافەتا، ەرلەر:

 1. قاراعاندى وبلىسى - 1.26,70 مينۋد.

 2. پاۆلودار وبلىسى - 1.28,94 مينۋد.

 3. اقمولا وبلىسى - 1.30,21 مينۋد.

4x200 مەترلىك ەستافەتا، ايەلدەر:

1. پاۆلودار وبلىسى - 1.44,58 مينۋد.

2. ش ق و. - 1.47,44 مينۋد.

اۆتور: كۇنسۇلتان وتارباي