تۋعان جەرىندە ءبىر اپتا دەمالعان ديماش قىتايعا قايتا ورالدى
ديماش قۇدايبەرگەن جاڭا جىلدان سوڭ اقتوبە قالاسىنا كەلدى. ول تۋعان-تۋىستارىمەن، دوستارىمەن، ۇستازدارىمەن كەزدەستى.
«ەلگە از كۇنگە دەمالىسقا كەلگەن ديماش بالام ۋاقىت تاۋىپ كەلىپ، سالەم بەرىپ كەتتى. قۋانىشىمىزدا شەك جوق. قاراپايىمدىلىعىڭنان، ادامي قاسيەتتەرىڭنەن، تاربيەلىلىگىڭنەن اينالدىم، سەندەي بالانىڭ. ماقتانامىن! امان بول! ساتتىلىك قايدا دا سەرىگىڭ بولسىن، التىنىم مەنىڭ!» - دەدى ديماشتىڭ ۇستازى مارات ايتىموۆ.
ايتا كەتەيىك، اقتوبەگە دەمالۋعا كەلگەن كەزىندە ديماش قۇدايبەرگەن شەتەل تولقۇجاتىن جاساتۋعا حالىققا قىزمەت كورسەتۋ ورتالىعىنا باردى. سونىمەن قاتار، تۋىستارىمەن كەزدەستى. ۋاقىتىنىڭ باسىم بولىگىن دەمالىسقا ارناعان ءانشىنى فاناتتارى اۋەجايدان كۇتىپ الىپ، جولعا شىعارىپ سالدى.
«ديماش دەمالىس الىپ، ۇيگە كەلدى. سونىمەن قاتار ول ءالى دە ۇلتتىق ونەر ۋنيۆەرسيتەتىندە ءبىلىم الادى. بيىل ءتورتىنشى كۋرستا. ول ءوز وقۋىن الەمدىك تۋرنەمەن ۇشتاستىرىپ وتىر. تاپسىرمالار الىپ، ەمتيحانىن تاپسىرىپ ءجۇر. شىن مانىندە الەمدىك تۋرنە ديماش ءۇشىن تاپتىرماس شەبەرلىك ساباعى، تاجىريبە»، - دەدى ديماشتىڭ اناسى سۆەتلانا ايتپايەۆا.
ديماش قۇدايبەرگەن «BG Talan» قىتايلىق كومپانياسىمەن 1,5 جىلعا كەلىسىمشارتقا قول قويدى. ەكى كونسەرتى قىتايدىڭ دجانشا جانە فۋدجوۋ قالاسىندا انشلاگپەن ءوتتى.
«ديماشتى رەسەي، كانادا، ا ق ش، يندونەزيا، ت م د ەلدەرىنەن كونسەرت قويۋعا شاقىردى. ديماش جىل سايىن قازاقستاندا ءبىر كونسەرتىن وتكىزەدى»، - دەدى سۆەتلانا ايتپايەۆا.
ديماش قۇدايبەرگەن الەۋمەتتىك جەلىدەگى ءوز پاراقشاسىندا ۇستازىنا بارىپ، ەركىن اڭگىمە ايتقانىن جازدى.
«اقتوبەدە ءدارىس العان احمەت جۇبانوۆ اتىنداعى كوللەدجىمە بارىپ، ۇستازدارىممەن كورىستىم. مەنى باعىپ-قاعىپ وسىرگەن ونەردەگى اكەم، ۇستازىم مارات اعايىمدى قاتتى ساعىنىپ قالىپپىن. مارە-سارە بولىپ، 3-4 ساعاتتىڭ قالاي تەز ءوتىپ كەتكەنىن بايقاماي دا قالىپپىز. ءسىزدىڭ ستۋدەنتىڭىز بولعانىم ءۇشىن ءوزىمدى باقىتتى جان سانايمىن. ءالى كۇنگە دەيىن اعايدىڭ الدىندا ءوزىمدى كىشكەنتاي بالا سەزىنىپ، قوبالجىپ وتىرامىن»، - دەپ جازدى ديماش قۇدايبەرگەن.
