رەسەي مەن ا ق ش قارىم-قاتىناسىنىڭ ناشارلاۋى الاڭداتادى - ق ر پرەزيدەنتى

ۆاشينگتون. قازاقپارات - قازاقستاندى رەسەي مەن ا ق ش قارىم-قاتىناسىنىڭ ناشارلاۋى الاڭداتادى.

بۇل تۋرالى بۇگىن اق ۇيدە امەريكا قۇراما شتاتتارىنىڭ پرەزيدەنتى دونالد ترامپ ەكەۋارا كەزدەسۋدەن كەيىن بىرلەسكەن مالىمدەمە جاساۋ بارىسىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.

«قازاقستان 2001-جىلى تەرروريزمگە قارسى كۇرەستە ا ق ش- قا بەلسەندى قولداۋ كورسەتتى جانە قازىرگى ۋاقىتتا دا اۋعانستاندا جۇرگىزىلىپ جاتقان اۋقىمدى جۇمىستارعا كومەك كورسەتىپ وتىر. اۋعانستاندا امەريكالىق اسكەردىڭ بولۋى بۇل تەك قانا ا ق ش- تىڭ ءىسى ەمەس. سونىمەن بىرگە بۇكىل الەم تەرروريزمنىڭ جاڭا وشاقتارىنا قارسى تۇرۋى ءتيىس. بۇل اۋعانستاننىڭ كورشىسى - ءبىزدىڭ بارلىعىمىزدىڭ مىندەتىمىز. قازاقستان وسى جىلداردىڭ ىشىندە 75 ميلليون دوللار گۋمانيتارلىق جانە تەحنيكالىق كومەك كورسەتتى. بۇعان قوسا مىڭ اۋعاندىق جاس وزدەرىندە جوق ماماندىقتاردى بىزدە وقۋدا. وعان 50 ميلليون دوللار جۇمسالدى»، - دەدى ەلباسى.

قازاقستان پرەزيدەنتى دونالد ترامپپەن كەزدەسۋ بارىسىندا ءبىرقاتار جاھاندىق ماسەلەلەر، ونىڭ ىشىندە سولتۇستىك كورەياداعى جاعدايدى تۇراقتاندىرۋ جايى تالقىلانعانىن ايتتى.

«ءوزىڭىز بىلەتىندەي، قازاقستان الەمدە كولەمى جونىنەن 4-ورىن الاتىن يادرولىق ارسەنالدان باس تارتىپ، سەمەيدەگى سىناق الاڭىن جاپتى. وسى ورايدا، باسقا دا يادرولىق قارۋى بار ەلدەرگە بىزدەن ۇلگى الۋعا شاقىرۋعا مورالدىق قۇقىعىمىز بار. مۇنداي اڭگىمەنى يرانمەن جۇرگىزدىك، قازىر سولتۇستىك كورەيامەن كەلىسسوز جۇرگىزە الامىز. ك ح در ماسەلەسىن قىتاي، ا ق ش، رەسەي تاراپى بىرلەسە شەشە الادى. سوندىقتان، كورشى ەل رەتىندە رەسەي مەن ا ق ش اراسىنداعى قارىم-قاتىناستىڭ ناشارلاپ كەتۋى ءبىزدى الاڭداتادى»، - دەدى نۇرسۇلتان نازاربايەۆ.

اۆتور: مارلان جيەمباي