يزرايلدىك كومپانيا قاراعاندىنى «اقىلدى قالاعا» اينالدىرماق

استانا. قازاقپارات - قاراعاندى وبلىسىنىڭ اكىمى ەرلان قوشانوۆ يزرايل مەملەكەتىنىڭ قازاقستان رەسپۋبليكاسىندا جانە قىرعىز رەسپۋبليكاسىنداعى توتەنشە جانە وكىلەتتى ەلشىسى ميحاەل برودسكيمەن كەزدەستى.

كەزدەسۋ بارىسىندا ايماقپەن سەرىكتەستىكتى دامىتۋ ماسەلەلەرى تالقىلاندى، دەپ حابارلايدى وبلىستىق اكىمدىكتىڭ باسپا ءسوز قىزمەتى.

كەزدەسۋدە، سونداي-اق، ءىرى يزرايلدىك كومپانيالار MER Group جانە NETAFIM وكىلدەرى بولدى. بيزنەسمەندەر وبلىس قالالارى مەن اۋىل شارۋاشىلىعىندا «اقىلدى» تەحنولوگيالاردى ەنگىزۋ بويىنشا قىزمەتتەردى ۇسىندى.

«قاراعاندى وبلىسى ەلىمىزدىڭ ءىرى ونەركاسىپ ايماعى بولىپ تابىلادى. ەكونوميكانىڭ نەگىزگى بولىگىن قارا جانە ءتۇستى مەتاللۋرگيا، تاۋ-كەن ونەركاسىبى، ماشينا قۇرىلىسى قۇرايدى. وبلىسىمىزدا وندىرىلەتىن ونىمدەر 50 دەن استام ەلگە ەكسپورتتالادى»، - دەدى ەرلان قوشانوۆ.

ول ءبىرىنشى كەزەكتە سمارت-تەحنولوگيالار سالاسىنداعى جاڭاشىلدىقتار قىزىقتى ەكەنىن اتاپ ءوتتى.

«سىزدەر بىلەتىندەي، مەملەكەت باسشىسى ءوزىنىڭ قازاقستان حالقىنا جولداۋىندا بۇگىنگى تاڭداعى نەگىزگى كەزەڭ «اقىلدى قالا» كونتسەپتسياسىن ىسكە اسىرۋ ەكەنىن اتاپ ءوتتى، - دەدى وبلىس اكىمى. - قاراعاندى وبلىسىندا ناقتى اتقارىمدار بار. ءبىز ساندىق جۇيەنى ەنگىزۋ ءۇشىن 11 باعىتتى انىقتادىق. ولار دەنساۋلىق ساقتاۋ، ءبىلىم، قاۋىپسىزدىك، قالانى باسقارى جانە تاعى باسقالارى. ناتيجەلەر بار، الايدا العا قاراي، باسقا سالالارعا جىلجۋ كەرەك. ءبىز وسى باعىتتا يزرايلدىك كومپانيالارمەن جۇمىس جاساۋعا دايىنبىز».

ايماق باسشىسى جوبالار نەگىزىنەن مەملەكەتتىك- جەكە مەنشىك سەرىكتەستىك جۇيەسى بويىنشا بولاتىنىن اتاپ ءوتتى.

«Mer Systems» كومپانياسىنىڭ وكىلدىگى MER Telecom Kazakhstan باس ديرەكتورى ۆلاديسلاۆ بەركوۆيچ الەۋەتتى سەرىكتەستىك ءۇشىن باعىتتاردى ۇسىندى. ونىڭ سوزىنشە، كومپانيا يزرايل مەن باسقا دا ەلدەردە «اقىلدى» كوشە جارىقتارى، قورعانىس جانە ت ج م سالالارىندا موبيلدى ورتالىقتار قۇرۋ، اقپاراتتىق قورعانىستى قامتاماسىز ەتۋ بويىنشا جوبالاردى ءساتتى ىسكە اسىرعان.

NETAFIM يزرايلدىك كومپانيا تامشىلاپ سۋارۋ، جىلىجاي كەشەندەرىن سالۋ بويىنشا ءوز تەحنولوگيالارىن ۇسىندى.

«استانادا وتكەن ەكسپو-2017 حالىقارالىق كورمەسى بارىسىندا بىزدە قاراعاندى وبلىسىنىڭ ەكسپورتتىق جاعدايىمەن تانىسۋ مۇمكىندىگى بولدى. ءبىز بۇگىن سەرىكتەستىكتى دامىتۋ بويىنشا كەلىسۋ ءۇشىن ادەيى كەلدىك. قاراعاندى وبلىسىنىڭ مۇمكىندىكتەرى كوپ. ولار: مىقتى ونەركاسىپ، دامىعان ينفراقۇرىلىم، گەوگرافيالىق ورنالاسۋى، ياعني استاناعا جاقىندىعى جانە ترانزيتتىك مۇمكىندىكتەر، سونىمەن قوسا حالىق الەۋەتى. وسى باسىمدىقتاردى پايدالانۋ كەرەك. مەن ءبىزدىڭ كەلىسىمگە كەلەتىنىمىزگە، جانە دە بيزنەسمەندەردىڭ ءوزارا پايدالى سەرىكتەستىككە قول جەتكىزەتىندەرىنە سەنىمدىمىن»، - دەپ قورىتىندىلادى كەزدەسۋدى ميحاەل برودسكي.