تەڭىز كەن الاڭىندا ءوندىرىس اۋقىمىن ۇلعايتۋ جۇمىستارى باستالدى
جاڭا زاۋىتتىڭ ىسكە قوسىلۋىمەن تەڭىز كەنىشىنەن الىناتىن مۇنايدىڭ كولەمى قوسىمشا 12 ميلليون تونناعا ارتىپ، جىلىنا 37 ميلليونعا جەتەتىن بولادى.
اتالعان جوبا - قازاقستان- ا ق ش اراسىنداعى ارىپتەستىك بايلانىستىڭ جەمىسى. تەڭىز كەنىشىندەگى ءۇشىنشى زاۋىتتىڭ قۇرىلىسى قازىر قارقىندى ءجۇرىپ جاتىر. بۇل بۇكىل ت م د اۋماعىنداعى وسى زامانعى ەڭ وزىق تەحنولوگياعا نەگىزدەلگەن مۇناي دايىنداۋ كەشەنى بولماق. زاۋىت جالپى سالماعى 53 مىڭ توننالىق دەربەس بولشەكتەردەن تۇرادى.
«تەڭىز جوباسىنىڭ كەڭەيۋى تەك اتىراۋ وبلىسى عانا ەمەس، جالپى ەل ەكونوميكاسىنىڭ دامۋىنا تىڭ سەرپىن بەرەدى»، - دەيدى ماماندار. قازىر مۇندا 25 مىڭنان استام ادام ەڭبەك ەتىپ جاتىر.
حەيميش پولس، قازاقستان- ا ق ش بىرلەسكەن كاسىپورنى باس مەنەدجەرىنىڭ ورىنباسارى:
- قازىردىڭ وزىندە 500-دەن استام قازاقستاندىق كومپانيامەن كەلىسىمگە قول قويىلدى. مودۋلدەر مەن باسقا دا قوندىرعىلاردى دايىنداۋعا ءىرىلى- ۇساقتى 1900 كومپانيا قاتىستىرىلادى. جوبا تەك اتىراۋ عانا ەمەس، اقتاۋ، اقتوبە، الماتى سەكىلدى قازاقستاننىڭ كوپتەگەن وبلىستارىن دا قامتيدى.
جاڭا جوبادان كەپىلدى تاپسىرىس العان وتاندىق كاسىپورىندار ماتەريالدىق بازالارىن جەتىلدىرىپ، ارنايى ماماندار دايارلاۋ ءىسىن باستادى. جوباداعى قازاقستاندىق ۇلەس شامامەن 3 تريلليون تەڭگەنى قۇرايدى.
سامات اجەنوۆ، وتاندىق سەرۆيستىك كومپانيانىڭ باس مەنەدجەرى:
- تەڭىز كەنىشىندەگى جاڭا جوبالار وتاندىق كاسىپورىنداردىڭ وركەندەۋىنە، قازاقستاندىق ۇلەستىڭ ارتۋىنا سەپتىگىن تيگىزدى. اسىرەسە پرەزيدەنت جولداۋىندا ايتقانداي، ادام كاپيتالىنىڭ ساپاسى دا ارتتى. مىسالى، ءبىزدىڭ كومپانيا قىزمەتكەرلەرىنىڭ 50 پايىزى - 40 جاسقا دەيىنگىلەر. ولار ءۇش تىلدە ەركىن سويلەيدى. بۇل - وتاندىق مامانداردىڭ الەمدىك ەڭبەك نارىعىنداعى باسەكەگە توتەپ بەرۋىنە باستايتىن باتىل قادام.
باتىس وڭىردە كەشەندى ءوندىرىلىپ جاتقان قازاقستان مۇنايىن الەمدىك نارىققا شىعارۋدىڭ جولدارى دا ايقىندالا باستادى. وتكەن جىلى تەڭىز مۇنايىن نوۆوروسسييسك پورتىنا جەتكىزەتىن كاسپي قۇبىر كونسورتسيۋمى تاسىمال قۋاتىن ارتتىردى. بۇل دا - شەتەل ينۆەستيتسياسىنىڭ جەمىسى. ءبىر عانا اتىراۋ وبلىسىندا 500-دەن استام شەتەلدىك بىرلەسكەن كومپانيا جەمىستى ەڭبەك ەتىپ جاتىر.
www.24.kz
