قازاقستانداعى كورەيا ەلشىسى: وليمپيادادا قازاقستان قۇراماسىنا جانكۇيەر بولامىز
دەپ حابارلايدى «قازاقپارات» ح ا ا ءتىلشىسى.
«وزدەرىڭىز بىلەتىندەي، كورەيا حالقى وڭتۇستىك پەن سولتۇستىك دەپ ەكىگە بولىنگەن. وسىعان قاراماستان، قىسقى وليمپيادا ويىندارىنا ك ح د ر قۇراماسىنىڭ قاتىساتىنى ءبىزدى قۋانتادى. وليمپيادا ويىندارى وسىلايشا، حالىقتى دوستاستىراتىن ىزگىلىك ويىندارىنا اينالايىن دەپ تۇر. وتكەن جىلدىڭ جەلتوقسان ايىندا مەن وتانىم - كورەيا رەسپۋبليكاسىنا بارىپ كەلىپ، وليمپيادالىق نىسانداردى ارالاپ قايتتىم. دايىندىقتىڭ ءساتتى اياقتالعانىنان كوزىمىز جەتىپ، نىسانداردىڭ تولىق بىتكەنىن جانە كورەيا مەيمانداردى قابىلداۋعا ءازىر ەكەنىن بىلدىك»، - دەيدى قازاقستانداعى كورەيا رەسپۋبليكاسىنىڭ توتەنشە جانە وكىلەتتى ەلشىسى كيم دەسيك.
ەلشى قازاقستان قۇراماسىنا جەتىستىكتەر تىلەيتىنىن ءبىلدىردى.
«مەن سونىمەن بىرگە، كورەيا رەسپۋبليكاسىنداعى قازاقستاننىڭ توتەنشە جانە وكىلەتتى ەلشىسىمەن كەزدەسۋگە مۇمكىندىك الدىم. ءبىز وتە عانيبەتتى اڭگىمە وربىتتىك. ءبىز قۇرامالاردىڭ قىسقى وليمپيادا ويىندارىنا دايىندىعى تۋرالى تىلدەسىپ، الداعى سپورتتىق شارا اياسىندا ەلشىلىكتەردىڭ ءوزارا قارىم- قاتىناسىن نىعايتا تۇسۋگە كەلىستىك. بارلىق ەلشىلىكتەر بۇل ويىنداردى اسىعا كۇتىپ وتىر. ءبىز قازاقستان ءۇشىن تاقىم قىسامىز»، - دەپ ءتۇيدى كيم دەسيك.
ەسكە سالا كەتسەك، بۇگىن استانادا وڭتۇستىك كورەيا ەلىنىڭ پحەنچحان قالاسىندا وتەتىن قىسقى وليمپيادا ويىندارىندا قازاقستان قۇراماسى كيىپ شىعاتىن سپورتتىق كيىمدەر كوپشىلىك نازارىنا ۇسىنىلدى. وڭتۇستىك كورەياداعى قىسقى وليمپيادا ويىندارىنا اتتاناتىن قازاقستاندىق سپورتشىلارعا بەرىلەتىن فورما: جىلى سپورتتىق كوستيۋم مەن شالبار، جىلى جەلەت، جاتتىعۋعا ارنالىپ تىگىلگەن جانە جەلدەن قورعايتىن كوستيۋمدەردەن تۇرادى. قازاقستان قۇراماسىنا وليمپيادالىق فورمانى جاپونيالىق «Mizuno» كومپانياسى تىككەن.
اۆتور: ايان بەكەن ۇلى
