ريمگە اتتانعالى جاتقان قازاق وپەرا ءانشىسى شىمكەنتتىك جاستارمەن كەزدەستى

 شىمكەنت. قازاقپارات - قازاقستاننىڭ ەڭبەك سىڭىرگەن قايراتكەرى، «استانا وپەرا» تەاترىنىڭ جەتەكشى ءسوليسى سۇندەت بايعوجين وڭتۇستىكتىڭ جاس ۆوكاليستەرىمەن كەزدەسىپ، ءوز تاجىريبەسىمەن ءبولىستى.

 اسقاق داۋىستى ءانشى وتكەن جىلى شارتتارى قاتاڭ ىرىكتەۋدەن ءوتىپ، ەۋروپانىڭ ەڭ اتاقتى تەاترلارىنىڭ ءبىرى - ريم ساحناسىندا ەكى جىل كولەمىندە ونەر كورسەتۋگە ارنايى شاقىرتۋ العان بولاتىن، دەپ حابارلايدى قازاقپارات ءتىلشىسى.

وبلىستىق ساز كوللەدجىندە وتكەن كەزدەسۋدە وپەرا مايتالمانى ۇلاعاتتى ۇستازداردىڭ تاربيەسى مەن تالابىنىڭ ارقاسىندا، بيىك بەلەسكە جەتكەنىن ايتتى. تەاتر ءانشىسى سوڭىنان ەرگەن ءىزباسارلارعا ىلكىمدى جول كورسەتۋ - شىنايى باقىت دەپ سانايدى.

 «بارلىق ۇيرەنگەنىمدى، العان تاجىريبەمدى بۇگىنگى جاستارعا جەتكىزۋگە تىرىسىپ وتىرمىن. بولاشاق وپەرا انشىلەرىمەن اشىق ديالوگ جۇرگىزدىم. نەگىزى، وپەرا ونەرى - وتە كۇردەلى ونەر. ءوزىڭىز بايقاپ قاراساڭىز، بيبىگۇل اپامىزدان كەيىنگى مايرا مۇحامەد قىزى، نۇرجامال پەرنەبەك قىزى بولىپ جاتسا، ودان كەيىنگى كەلە جاتقان ساتىنىڭ اراسىندا 15 جىلداي بار. ول وتە مۇشكىل جاعداي. ءابىر ونەر ورداسىن بىتىرگەن شاكىرت ءوز جولىن تاۋىپ جاتسا، ول ۆوكالدان تەاترعا شىعىپ، ءان ايتا ءبىلۋى كەرەك» ، - دەيدى ول.

 بۇگىندە تالانتتى ءانشى كەرەمەت داۋىسىمەن، ەڭبەكقورلىعىمەن قازاقستاندى عانا ەمەس، وزگە ەلدەردى دە ءتانتى ەتىپ جۇرگەنى راس. وتكەن جىلدىڭ سوڭعى ايلارىندا بۇكىل الەمدى شارلاسا دا، تۋعان جەرىنەن ارتىق ىستىق جەردى، جىلى ءىلتيپاتتى كورمەيتىنىن اتاپ ءوتتى. ءانشىنىڭ پاتريوتتىق رۋحى، تاباندىلىعى، ونەرگە دەگەن ەرەكشە سۇيىسپەنشىلىگى ءاربىر جاسقا جارقىن ۇلگى بولارلىقتاي.

 ايتا كەتسەك، سۇندەت بايعوجين - كوپتەگەن مارتەبەلى حالىقارالىق بايقاۋلاردىڭ لاۋرەاتى، سونىڭ ىشىندە ب. تولەگەنوۆا اتىنداعى حالىقارالىق ۆوكاليستەر بايقاۋىنىڭ باس جۇلدەگەرى، يتالياداعى Toti dal Monte (ترەۆيزو ق. ) حالىقارالىق بايقاۋىنىڭ جانە Arena di Verona قورىنىڭ وپەرا انشىلەر بايقاۋىنىڭ جانە ت. ب. سايىستاردىڭ جەڭىمپازى. ءارتىس نيۋ- يوركتەگى (ا ق ش) كارنەگي- حولدا، بەرلين فيلارمونياسىندا (گەرمانيا) ، پاريجدەگى ەليسەي الاڭدارى تەاترىندا (فرانسيا) ، ۆەنا كونسەرتحاۋستا (اۆستريا) جانە وزگە دە الەمگە تانىمال ساحنالاردا، سونىمەن قاتار جاپونيا، وڭتۇستىك كورەيا، تۇركيا، يوردانيا، تۇرىكمەنستان، رەسەي، بەلارۋس جانە ت. ب. ەلدەردە وراسان زور جەتىستىكپەن ونەر كورسەتكەن.

 

اۆتور: اينۇر اقبايەۆا