قىسقى وليمپيادا قازاقستان تۋىن ۇستاپ شىققان سپورتشىلار كىمدەر؟

استانا. قازاقپارات - وليمپيادا ويىندارىندا تۋ ۇستاپ شىعۋ ۇلكەن ابىروي. جانە ول سپورتشىعا اۋىر مىندەت. سەبەبى تۋ كوتەرىپ شىققان سپورتشى ونى جاي كوتەرىپ قانا قويماي، جەڭىسىمەن قايتا جەلبىرەتىپ قايتۋعا بارىنشا كۇش-جىگەرىن سالۋعا تىرىسادى.

كەڭەس وكىمەتىنىڭ تۇسىندا بۇل قۇرمەت قازاقستاندىق سپورتشىلاردىڭ ءۇش ۇيىقتاسا دا تۇسىنە كىرمەيتىن ارمانى بولاتىن. مىنە، تاۋەلسىزدىگىمىزدىڭ ارقاسىندا ول ارماندار دا ورىندالىپ جاتىر.

قازاقستان تاۋەلسىزدىك العالى قاتىسقان 6 جازعى، 6 قىسقى وليمپيادا ويىندارىندا مەملەكەت باسشىسى نۇرسۇلتان نازاربايەۆ سەنىپ تاپسىرعان ەل تۋىن جوعارى كوتەرىپ شىققان سپورتشىلاردان تەك ءبىر سپورتشى عانا چەمپيون اتانىپ، پرەزيدەنتكە بەرگەن ۋادەسىن ورىندادى. كوتەرىپ شىققان كوك تۋىن ابىرويمەن جەلبىرەتىپ قايتا الىپ كەلدى. ول - سيدنەي وليمپياداسىنىڭ چەمپيونى ەرماحان ىبىرايىموۆ بولاتىن.

ال قىسقى وليمپيادا ويىندارىندا 1998-جىلعى جاپونيانىڭ ناگانو قالاسىندا وتكەن ⅧX قىسقى وليمپيادا ويىندارىندا قازاقستان تۋىن كوتەرىپ شىققان شاڭعىشى ۆلاديمير سميرنوۆ قولا مەدالمەن ورالدى. ول 1994-جىلى نورۆەگيانىڭ ليللەحامەر قالاسىندا وتكەن قىسقى وليمپيادادا 1 التىن، 2 كۇمىس جۇلدە جەڭىپ العان بولاتىن. مىنە، سودان كەيىن، ءالى ەشبىر سپورتشىمىز تۋدى كوتەرىپ بارىپ جەڭىسپەن ورالىپ كورگەن ەمەس.

بيىلعى جىلدىڭ باستى دوداسى وڭتۇستىك كورەيانىڭ پحەنچحان قالاسىندا وتەتىن XXIII قىسقى وليمپيادا ويىندارىنىڭ سالتاناتتى اشىلۋ راسىمىندە قازاقستان تۋىن شورت-ترەكتەن الەم كۋبوگىنىڭ، ۋنيۆەرسيادا، ازيا ويىندارىنىڭ جۇلدەگەرى، 2014-جىلعى سوچيدە وتكەن وليمپيادا ويىندارىنىڭ قاتىسۋىشىسى ابزال اجعاليەۆ كوتەرىپ شىعاتىنىن وسىعان دەيىن حابارلاعان بولاتىنبىز. ەندەشە، اجعاليەۆكە ارتىلاتىن مىندەت اۋىر ەكەنى انىق...

ەندى، وسىعان دەيىنگى قىسقى وليمپيادا ويىندارىندا قازاقستان تۋىن كىمدەر كوتەرىپ شىققانىن قازاقپارات وقىرماندارىنىڭ ەسىنە سالۋدى ءجون ساناپ وتىرمىز.

قىسقى وليمپيادا ويىندارىندا تۋ ۇستاپ شىققان سپورتشىلارىمىز:

ليللەحاممەر - 1994-جىلعى قىسقى وليمپيادا ويىندارى - كايرات بيەكەنوۆ (ترامپليننەن سەكىرۋ)

ناگانو - 1998-جىلعى قىسقى وليمپيادا ويىندارى - ۆلاديمير سميرنوۆ (شاڭعى جارىسى)

سولت-لەيك-سيتي - 2002-جىلعى قىسقى وليمپيادا ويىندارى - راديك بيكچەنتايەۆ (كونكيمەن جۇگىرۋ)

تۋرين - 2006-جىلعى قىسقى وليمپيادا ويىندارى - الەكساندر كورەشكوۆ (حوككەي)

ۆانكۋۆەر - 2010-جىلعى قىسقى وليمپيادا ويىندارى - دياس كەنەشەۆ (بياتلونشى)

سوچي - 2014-جىلعى قىسقى وليمپيادا ويىندارى - ەردوس احماديەۆ، (شاڭعى جارىسى).

اۆتور: كۇنسۇلتان وتارباي