جەكەشەلەندىرۋدەن تۇسكەن قىرۋار قارجى ۇلتتىق قورعا ءتۇستى مە؟

استانا. قازاقپارات - ۇكىمەتتىڭ بۇگىنگى وتىرىسىندا ق ر پرەمەر-ءمينيسترى باقىتجان ساعىنتايەۆ جەكەشەلەندىرۋدەن تۇسكەن قىرۋار قارجىنى ۇلتتىق قورعا ۋاقىتىندا اۋدارۋدى تاپسىردى، دەپ حابارلايدى قازاقپارات ءتىلشىسى.

وتىرىس بارىسىندا ق ر قارجى ءمينيسترى باقىت سۇلتانوۆ جەكەشەلەندىرۋ بويىنشا ەسەپ بەردى. بايانداما سوڭىندا ۇكىمەت باسشىسى وعان: «2017-جىلى 108 ميلليارد تەڭگەگە 190 نىسان ساتىلعان. ەلباسى بىرنەشە مارتە ايتتى، جەكەشەلەندىرۋدەن تۇسكەن قارجىنىڭ بارلىعى ۇلتتىق قورعا اۋدارىلۋى قاجەت. 108 ميلليارد ۇلتتىق قورعا كەتتى مە؟ جوق، الدە ساتىلعان جەردە قالىپ قويدى ما؟»، - دەگەن ساۋالىن جولدادى.

قارجى ءمينيسترى ءسال بوگەلگەننەن كەيىن: «باقىتجان ءابدىر ۇلى، ...رەسپۋبليكالىق مەنشىكتەگى ساتىلعان نىساندار بويىنشا بارلىق تۇسكەن اقشا ۇلتتىق قورعا جىبەرىلگەن بولاتىن. ول - 7 ميلليارد.. .5 ميلليارد مىنا.. .سوڭعى ايدا وتكەن... وسى قاڭتار ايىندا تاعى 5 ميلليارد ۇلتتىق قورعا جىبەرىلەتىن بولادى. ءبىراق ءتيىستى قاۋلى بار. ەندى، ۇلتتىق حولدينگتەرمەن پروبلەما ءالى بار. ءتيىستى ۇكىمەت قاۋلىسىن قازىر ۇلتتىق ەكونوميكا مينيسترلىگى دايىنداپ جاتىر. ونى قابىلداعاننان كەيىن قاجەتتى شەشىمدەر قوسىمشا قابىلدانادى»، - دەپ اتاپ كورسەتتى باقىت سۇلتانوۆ.

ق ر پرەمەر-ءمينيسترى جەكەشەلەندىرۋدەن تۇسكەن قارجىنى ۇلتتىق قورعا اۋدارۋ تۋرالى مەملەكەت باسشىسىنىڭ تاپسىرماسىن ورىنداۋ قاجەتتىگىنە باسا نازار اۋداردى.

اۆتور: ارمان اسقاروۆ