نۇروتاندىقتار حالىقارالىق تەرميندەردىڭ اۋدارمالارىن قايتا قاراۋدى ۇسىندى

استانا. قازاقپارات - قازاقستان جازۋشىلار وداعىنىڭ مۇشەسى عالىمبەك جۇماتوۆ حالىقارالىق تەرميندەردىڭ قازاق تىلىندەگى اۋدارمالارىن قايتا قاراۋدى ۇسىندى.

بۇل تۋرالى ول «نۇر وتان» پارتياسى پاۆلودار وبلىستىق فيليالىندا وتكەن دەموكراتيالىق كۇشتەردىڭ «قازاقستان-2050» ايماقتىق كواليتسياسىنىڭ وتىرىسىندا ايتتى، دەپ حابارلايدى قازاقپارات pavlodarnews.kz سايتىنا سىلتەمە جاساپ.

ءىس-شارا مەملەكەت باسشىسىنىڭ جولداۋىن تالقىلاۋعا ارنالدى.

«جولداۋ ادام مەن ونىڭ دەنساۋلىعىن، ءال-اۋقاتىن ارتتىرۋعا باعىتتالعان. ەل دامۋىنىڭ باسىم باعىتى يندۋستريا، اگرووندىرىستىك كەشەن، كولىكتىك-لوگيستيكالىق ينفراقۇرىلىمنىڭ تسيفرلاندىرىلۋى، زاماناۋي تەحنولوگيالاردى تۇرعىن ءۇي قۇرىلىسى مەن كوممۋنالدىق سالادا ەنگىزۋ بولىپ تابىلادى. بۇل قازاقستاننىڭ الەمدەگى الدىنعى قاتارلى ەلدەر ساناتىنا ەنۋى ءۇشىن قاجەت»، - دەدى «نۇر وتان» پارتياسى وبلىستىق فيليالى ءتوراعاسىنىڭ ءبىرىنشى ورىنباسارى يليا تەرەنچەنكو.

«اۋىل» ح د پ پ وبلىستىق فيليالىنىڭ ءتوراعاسى ەرمات بايعۇرمانوۆ تا اتالعان قۇجاتتىڭ بارلىق باعىتتارىن سانامالاپ، ءوز پىكىرىن جەتكىزدى. ونىڭ اتاپ وتۋىنشە، اگرووندىرىستىك كەشەندى دامىتۋ ءۇشىن اۋىلداعى كاسىپكەرلىكتى بارىنشا قولداپ، اۋىلدىق بيزنەسمەندەر الدىنداعى بيۋروكراتيالىق كەدەرگىلەردى جويۋ كەرەك.

وتىرىس بارىسىندا قاتىسۋشىلار جولداۋدىڭ باسقا دا ماڭىزدى تۇستارىنا توقتالدى. قازاقستان جازۋشىلار وداعىنىڭ مۇشەسى عالىمبەك جۇماتوۆ ەلباسىنىڭ قازاق تىلىنە قاتىستى ايتقان پىكىرىنە قولداۋ ءبىلدىردى.

«پرەزيدەنتىمىز بىرنەشە جىل بويى قازاق تىلىندەگى حالىقارالىق تەرميندەردى اۋدارۋ ماسەلەسىنە ەرەكشە نازار اۋدارىپ كەلەدى. مىسال ءۇشىن «قىلتيما»، «دۇڭگىرشەك» جانە «قولتىراۋىن» سەكىلدى سوزدەر ءتىلىمىزدىڭ ابىرويىن وسىرۋدە دەي الماسپىن. ءتىلدى وسى سياقتى تەرميندەرمەن كۇردەلىلەندىرۋ - قاتەلىك. ءبىز دۇنيەجۇزىلىك قاۋىمداستىقتىڭ مۇشەسى ەكەندىگىمىزدى ۇمىتپاعان ابزال. سوندىقتان الەمدىك جاڭالىقتاردان تىس قالماۋ كەرەك»، - دەپ ءوز پىكىرىن ءبىلدىردى عالىمبەك جۇماتوۆ.