تارازدا ءبىر كۇن ىشىندە ءبىر ايلىق مولشەردەگى قار جاۋدى

تاراز. قازاقپارات - تارازدا جانە وبلىستىڭ ءبىرقاتار اۋداندارىندا ءۇشىنشى كۇن قاتارىنان توقتاماي قار جاۋىپ تۇر، دەپ حابارلايدى «قازاقپارات» ح ا ا ءتىلشىسى.

سوڭعى جىلدارى وڭىردە قىس جىلى بولعان. اۋا تەمپەراتۋراسى كوبىنە پليۋستى كورسەتىپ، ءتىپتى كوك شىعىپ، كۇن جارقىراپ تۇراتىن. ءتىپتى 2018-جىلدىڭ ءوزىن تارازدىقتار قارسىز قارسى العان ەدى. الايدا ەسكى جاڭا جىل قالاعا اياز الا كەلىپ، ارتى تولاسسىز قارعا ۇلاستى.

«قازگيدرومەت» ر م ك حابارلاۋىنشا، وتكەن ءبىر تاۋلىكتىڭ وزىندە قالادا ءبىر ايلىق مولشەردەگى قار جاۋعان. قازىردىڭ وزىندە قاردىڭ قالىڭدىعى 30 سانتيمەترگە جەتكەن.

قالا تۇرعىندارى مۇنداي قار مەن ايازدى سوڭعى 12 جىلدا كورمەگەن. 2005-جىلى جارتى مەتردەي قار تۇسكەن، ودان كەيىن قىس جايلى بولعان.

الداعى بىرنەشە كۇن بويى وبلىستا اۋا تەمپەراتۋراسى - 8 - 10 گرادۋسقا دەيىن تومەندەپ، قار جاۋادى دەپ كۇتىلىپ وتىر. جەل تۇرىپ، كەي جەردە جىلدامدىعى 28 م/س- عا دەيىن جەتپەك.