الماتى وبلىسى استاناعا جاڭا ساياباق سالىپ بەرەدى

استانا. قازاقپارات - الماتى وبلىسى ەلورداعا وتباسىلىق دەمالىس ساياباعىن سالىپ بەرەدى.

بۇل تۋرالى استانا اكىمدىگىنىڭ اكتيۆىمەن ەلباسىنىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن تالقىلاۋ كەزىندە اسەت يسەكەشەۆ ايتتى، دەپ حابارلايدى Elorda Info.

«پاركتەر مەن الاڭداردى كوگالداندىرۋ دا ماڭىزدى ماسەلەلەردىڭ ءبىرى بولىپ تابىلادى. بيىل بىزدە ءبىرقاتار ماڭىزدى جوبالار بار. استانادا «جەتىسۋ» وتباسىلىق دەمالىس ساياباعى قۇرىلادى. بۇل جوبانى استانا قالاسىنىڭ 20 جىلدىق مەرەيتويى اياسىندا الماتى وبلىسىنىڭ اكىمدىگى جۇزەگە اسىرادى. وتباسىلىق دەمالىس ورىندارى، سپورتتىق الاڭدارى مەن اتكەنشەكتەرى بار وتە ادەمى ساياباق بولادى»، - دەدى اسەت يسەكەشەۆ.

قالانى جاسىلداندىرۋدىڭ باستى جوباسى - بوتانيكالىق باق. ونىڭ قۇرىلىسى 2018-جىلى اياقتالادى. قالادا سونداي-اق سۇرىلەتىن اپاتتى ۇيلەردىڭ ورنىنا گۇل باقتارى سالىناتىن بولادى.

«سونىمەن قاتار 60 شاقىرىمنان استام ۆەلوسيپەد جولدارىن سالۋ جوسپارلانىپ وتىر. مەنىڭ ويىمشا، بۇل سپورتقا باۋليتىن جاقسى جوبا»، - دەدى قالا اكىمى.