كيەلى جەرلەردىڭ مارتەبەسى زاڭمەن بەكىتىلەدى

استانا. قازاقپارات - ەلىمىزدە الداعى ۋاقىتتا تاريحي نىسانداردى قورعاۋ زاڭناماسىنا وزگەرىستەر ەنگىزىلەدى، دەپ حابارلايدى قازاقپارات ءتىلشىسى.

 «كيەلى قازاقستان» عىلىمي- زەرتتەۋ ورتالىعىنىڭ باسشىسى بەرىك ءابدىعالي ۇلىنىڭ ايتۋىنشا، تاريحي- مادەني نىساندار تۋرالى زاڭدا كيەلى جەرلەردىڭ ناقتى مارتەبەسى جازىلادى. «قاسيەتتى جەرلەر» دەگەن ارنايى تارماق بولادى. وعان دەيىن مەملەكەتتىك ءتىزىلىم جاسالادى. اتالعان ءتىزىلىمدى قۇزىرەتتى ورگان - مادەنيەت جانە سپورت مينيسترلىگى جاسايدى دا، ءاربىر نىساننىڭ عىلىمي- ساراپتامالىق ءتولقۇجاتىن ەنگىزەدى. ال تاريحي نىساننىڭ ءتولقۇجاتى بولىپ، تىزىلىمگە ەنسە، ونىڭ ناقتى مارتەبەسى بولادى دەگەن ءسوز»، - دەدى ب. ءابدىعال ۇلى «قازاقستاننىڭ كيەلى جەرلەرىنىڭ گەوگرافياسى» II رەسپۋبليكالىق فورۋمىندا.

عالىمنىڭ ايتۋىنشا، وسىمەن كيەلى جەرلەردى انىقتاۋ جۇمىسى اياقتالىپ وتىرعان جوق. زەرتتەۋلەر جالعاسا بەرەدى. تالقىلاۋ شارالارى دا جۇرەدى. سوعان قاراي كيەلى جەرلەردىڭ تىزىمىنە وزگەرىستەر ەنگىزىلىپ تۇرادى. «ءبىزدىڭ ساراپتامالىق كەڭەسىمىزدە ءتىزىم ماقۇلداندى. دەگەنمەن، تولىقتىرۋ، ىزدەستىرۋ جۇمىسى جالعاسا بەرەدى»، - دەپ اتاپ كورسەتتى ب. ءابدىعالي ۇلى.

 ايتا كەتەيىك، بۇگىنگى فورۋم اياسىندا «رۋحاني جاڭعىرۋ» زالى اشىلدى. فورۋمنىڭ باسىندا جالپى ۇلتتىق جانە ايماقتىق ماڭىزى بار تاريحي نىساندارعا ارنالعان ەكى جيناق تانىستىرىلدى. سول جەردە «كيەلى قازاقستان» عىلىمي- زەرتتەۋ ورتالىعىنىڭ باسشىسى بەرىك ءابدىعالي ۇلى تاريحي نىسانداردى ىرەكتەۋ جۇمىسىنىڭ قالاي جۇرگىزىلگەنىن، نە ءۇشىن عىلىمي دايەكتەرگە عانا ەمەس، اڭىز- اڭگىمەلەرگە دە باسىمدىق بەرىلگەنىن ايتىپ بەردى.