قازاقستاننىڭ كيەلى جەرلەرىنە ونلاين رەجيمدە ساپار جاسايمىز - بەرىك ءابدىعالي ۇلى
الداعى ۋاقىتتا بارلىق نىساندارعا ونلاين ساپار جاساۋ قىزمەتى قوسىلادى، دەپ حابارلايدى قازاقپارات ءتىلشىسى.
«مىنە، بۇگىن ءبىز سول كىتاپتاردىڭ تۇساۋكەسەرىن جاساپ وتىرمىز. جالپىۇلتتىق جانە ايماقتىق كيەلى جەرلەردىڭ ءتىزىمى ەكى بولەك كىتاپ رەتىندە العاش رەت جارىققا شىقتى. بۇل - ءبىزدىڭ ورتاق ەڭبەگىمىز. ارنايى ساراپتامالىق كەڭەسكە ەنگەن بەلگىلى عالىمدار، قوعام قايراتكەرلەرى ءاربىر نىساندى كەڭىنەن تالقىعا سالدى. ايماقتاردان جىبەرىلگەن ءتىزىمنىڭ 90 پايىزى ەندى. وسى جۇمىستاردى ءالى دە جالعاستىرۋ قاجەت. ءبىز كيەلى جەرلەردى انىقتادىق. ەندىگى ماقسات - سونىڭ بارلىعىن كەڭىنەن ناسيحاتتاۋ»، - دەيدى «كيەلى قازاقستان» عىلىمي-زەرتتەۋ ورتالىعىنىڭ باسشىسى بەرىك ءابدىعالي ۇلى
ونىڭ ايتۋىنشا، قازىرگى كەزدە جارىققا شىققان كىتاپتاردىڭ ەلەكتروندىق نۇسقاسى ازىرلەنىپ جاتىر.
«بۇگىندە ايماقتىق كيەلى جەرلەردىڭ ءتىزىمى ينتەراكتيۆتى كارتاعا ەنگىزىلىپ وتىر. ال جالپى ۇلتتىق كيەلى جەرلەر بويىنشا كوپ فۋنكتسيونالدى 3D تۋرى بار كارتا جاسالۋدا. بۇل ورتاق كارتا بولادى. وعان ەكەۋى دە (جالپى ۇلتتىق جانە ايماقتىق نىساندار - اۆت.) كىرەدى. بولاشاقتا بارلىعىنا 3D كىرە الاتىنداي جاسايمىز دەگەن ويىمىز بار. ءاربىر ازامات قايدا جۇرسە دە، قازاقستاندا ما، شەتەلدە مە، كارتاعا كىرىپ، باراتىن جەرىن باسسا، جولىن دا كورسەتىپ بەرەدى، اڭىزىن دا ايتىپ بەرەدى. بۇنىڭ بارلىعى ۇيالى قوسىمشا ۇلگىسىندە جۇمىس ىستەيدى»، - دەپ اتاپ كورسەتتى ب. ءابدىعالي ۇلى.
ايتا كەتەيىك، جالپى ۇلتتىق ماڭىزى بار كيەلى جەرلەر تۋرالى جيناق ءۇش تىلدە جارىق كوردى. تارالىمى - 1000 دانا. ايماقتىق نىساندارعا ارنالعان جيناقتىڭ دا تارىلىمى سونداي. ءبىراق اتالعان كىتاپ قازاق جانە ورىس تىلدەرىندە باسىلدى. بۇدان بولەك، قازاقستاننىڭ كيەلى جەرلەرى بويىنشا ارنايى ەنتسيكلوپەديا شىعارىلدى. ونى تارىلىمى - 2000 دانا. وعان استانا مەن اقمولا وبلىسىندا، سونداي- اق الماتى مەن الماتى وبلىسىندا ورنالاسقان تاريحي نىساندار ەندى. بۇگىنگى فورۋم اياسىندا ۇلتتىق مۋزەيدە «رۋحاني جاڭعىرۋ» زالى اشىلدى. سونداي-اق، ازىرەت سۇلتان مەن قارازان كەشەندەرىنىڭ 3D ۇلگىسى كورسەتىلدى.
اۆتور: ارمان اسقاروۆ
