وڭتۇستىك كورەيا مەن ك ح د ر كەلىسسوزدەردى جالعاستىرادى

سەۋل- استانا. قازاقپارات - كەلەسى اپتادا رەسمي سەۋل مەن پحەنيان ك ح د ر دەلەگاتسياسىنىڭ پحەنچحانداعى قىسقى وليمپيادا ويىندارىنا قاتىسۋى ماسەلەسىن ەگجەي- تەگجەيلى تالقىلاۋ ءۇشىن كەلىسسوزدەرگە كىرىسەدى،

 دەپ حابارلايدى وڭتۇستىك كورەيانىڭ ريەنحاپ اقپارات اگەنتتىگى.

وڭتۇستىك كورەيانىڭ بىرىگۋ ىستەرى جونىندەگى مينيسترلىگى جەكسەنبى كۇنى كەلىسسوزدەردىڭ 15 - قاڭتارعا بەلگىلەنگەنىن مالىمدەدى. تاراپتار ك ح د ر- نىڭ 9-25 - اقپان كۇندەرى وتەتىن وليمپياداعا ءوز بيشىلەرى مەن مۋزىكانتتارىن جىبەرۋ جوسپارىن تالقىلايدى.

 «ءبىز سولتۇستىك كورەيامەن كەلىسسوزدەردى تاڭعى 10-دا باستاۋدى ۇسىندىق. كەلىسسوزدەردىڭ ەگجەي- تەگجەيلى باعدارلاماسى بۇگىن جاسالۋى ءتيىس»، - دەيدى مينيسترلىكتىڭ وكىلى.

 بۇل رەسمي سەۋل مەن پحەنيان اراسىنداعى وسى ايداعى ەكىنشى كەلىسسوز بولماق. مينيسترلەر دەڭگەيىندەگى سوڭعى ەكى جىلداعى العاشقى كەزدەسۋ 9 - قاڭتار كۇنى پحانمۋندجوم شەكارالىق بەكەتىندە بولدى.

ايتا كەتەرلىگى، كەلىسسوزدەر اياسىندا سولتۇستىك كورەيا وليمپيادا ويىندارىنا سپورتشىلاردان بولەك، بيشىلەرىن، مۋزىكانتتارىن، تحەكۆوندودان كورنەكى كومانداسىن، ءتىپتى جۋرناليستەردى دە جىبەرۋدى ۇسىندى.

بۇل جولعى كەزدەسۋدە، بولجام بويىنشا، سولتۇستىك كورەيا دەلەگاتتارىنىڭ سانى، دەلەگاتسيانىڭ وليمپياداعا كەلۋ- كەتۋ باعدارى، سونداي- اق سولتۇستىك كورەيالىق انشىلەرى مەن بيشىلەرىنىڭ ونەر كورسەتۋىنە قاتىستى ماسەلەلەر جان- جاقتى تالقىلانادى.