سىر ءوڭىرى العاش رەت قىتايعا بالىق ەكسپورتتادى
ال ەكسپورتقا 3 مىڭ 400 توننا بالىق ءونىمى شىعارىلىپ وتىر. بۇعان دەيىن ەۋروپا نارىعىن ەڭسەرگەن كاسىپورىندار جۋىردا العاش رەت ونىمدەرىن قىتايعا ساۋدالاي باستادى.
بۇل - ەۋروپاعا بالىق ونىمدەرىن ەكسپورتتايتىن سىر وڭىرىندەگى 3 زاۋىتتىڭ ءبىرى. مۇندا تاۋلىگىنە 1 جارىمنان 5 تونناعا دەيىن سۋ مارجانى وڭدەلەدى. كاسىپورىن ءونىمى بيىل العاش رەت قىتايعا ەكسپورتتالدى.
عازيزا قۇلنياز، تەحنولوگ:
- بىزدە وسى جەردە ارال اۋدانىنا قاراستى بوگەن ەلدى مەكەنىندە ۇلكەن سەرۆيستىك دايىنداۋ ورتالىعىمىز بار. تاستۇبەك، ءۇش شوقى دەگەن ۋچاسكەلەردە بالىق اۋلانىپ، جىلىنا ماۋسىمدىق جانە تۇراقتى جۇمىسپەن قامتىلعان بىرنەشە بولىمشەمىز بار. زاماناۋي قوندىرعىلاردىڭ كومەگىمەن بار- جوعى 2 مينۋتتىڭ ىشىندە 20 كەلى بالىقتى تازالاۋعا بولادى. ودان كەيىن بىرنەشە ساتىلى وڭدەۋدەن وتەدى.
بۇل كوكسەركە بالىعى - ارال تەڭىزىندەگى ەڭ قۇندى سۋ مارجاندارىنىڭ ءبىرى. اسىرەسە ەۋروپادا ەرەكشە سۇرانىسقا يە. ويتكەنى بۇل بالىقتىڭ قۇرامى قاجەتتى دارۋمەندەرگە وتە باي. جانە سۇبە ەتى بولەك كەسىلىپ الىنىپ، شەتەلگە ەكسپورتتالادى. ال قالعان بولىگى ءدال وسى جەردە قالدىقسىز وڭدەلەدى. ماسەلەن، بەت ەتى مەن توستىگى دۇكەندەرگە ساۋداعا شىعارىلسا، قالعان بولىگىن فارشقا اينالدىرىپ، سۇيەگىن ۇن رەتىندە تارتادى ەكەن.
جالپى ارال ماڭىندا وسىنداي 8 بالىق وڭدەۋ زاۋىتى بار. ولار جىلىنا 11 مىڭ توننا دايىن ءونىم شىعارۋعا قاۋقارلى. بالىق شارۋاشىلىعىنىڭ قارقىندى دامۋى ايماقتاعى بالىق ونىمدەرىنىڭ ەكسپورتىن سوڭعى 3 جىلدا 2 ەسەگە ارتتىرۋعا مۇمكىندىك بەرگەن.
جالعاس احمەتوۆ، وبلىستىق تابيعي رەسۋرستار باسقارماسىنىڭ ءبولىم باسشىسى:
- تەك وتكەن جىلدىڭ وزىندە ەكسپورتقا 3400 توننا بالىق ونىمدەرى شىعارىلدى. ونىڭ 70 پايىزى - 2200 تونناداي رەسەي فەدەراتسياسىنا، 900 توننانىڭ ۇستىندە ەۋروپا ەلدەرىنە، ونىڭ ىشىندە دانيا، نيدەرلاند مەملەكەتى، پولشا مەملەكەتتەرىنە شىعارىلسا، 60 تونناداي ءبىرىنشى رەت قىتاي مەملەكەتىنە بالىق ونىمدەرى شىعارىلدى.
وڭىردە بالىق قورىن ساقتاۋ جۇمىستارى دا جۇيەلى جۇرۋدە. جىل سايىن ارال تەڭىزى مەن ونىڭ ماڭىنداعى سۋ ايدىندارىنا 15 ميلليونداي شاباق جىبەرىلەدى. ودان بولەك قىزىل كىتاپقا ەنگەن ارال قايازى بالىعىن كوبەيتۋ قولعا الىنىپ وتىر.
اۆتورلارى: نۇرلان جاقىپبەكوۆ، ءالحايدار تۇرلىحانوۆ
www.24.kz
