قانداسىمىزدىڭ قازاق مادەنيەتى تۋرالى كىتابى موڭعول تىلىندە جارىق كوردى - شەتەلدەگى قازاق ءتىلدى ب ا ق- قا شولۋ
موڭعوليالىق قازاق سترينگ ارتپەن ەل پرەزيدەنتىنىڭ سۋرەتىن سالىپ تاڭعالدىردى - kaznews.mn
قايرات ايات ۇلىنىڭ سىزعان موڭعوليا پرەزيدەنتى حالتمااگين باتتۋلگانىڭ سۋرەتى جاڭا جىل قارساڭىنداعى ءباسساۋدادا 5,0 ميلليون توگروگكە (شامامەن 700 مىڭ تەڭگە) ساتىلدى. بۇل تۋرالى وسى اپتادا موڭعوليالىق اقپاراتتىق پورتال kaznews.mn حابارلاعان بولاتىن. «سترينگ ارت» دەپ اتالاتىن بۇل ونەر شەگە جانە تىگىن ءجىبى ارقىلى سىزىلاتىنى بەلگىلى.
اقپارات كوزىنىڭ مالىمەتىنە سۇيەنسەك، قايرات ايات ۇلىنىڭ بۇل ونەرگە قىزىعۋشىلىعىنىڭ ارتۋىنا قىرعىز ەلىنىڭ سۋرەتشىسى ازامات جاناليەۆ سەبەپكەر بولعان ەكەن. سۋرەتشى موڭعوليا پرەزيدەنتى حالتمااگين باتتۋلگانىڭ وسى سۋرەتىن نەبارى 10 كۇندە جاساپ شىققانىن ايتادى.
«سونىمەن قاتار، سۋرەتشىنىڭ «اباي»، «قازاق باتىرى»، «تۇلپار» سەكىلدى سترينگ ارت جانرىمەن سالعان سۋرەتتەرى بار» دەپ جازادى kaznews.mn.
قازاقستان پرەزيدەنتى قىتايمەن بولعان قارىم-قاتىناسىنا اسا ءمان بەرەتىنىن ءبىلدىردى - «حالىق گازەتى»
ءدال وسىنداي تاقىرىپتاعى جاڭالىق قىتايلىق تانىمال اقپاراتتىق پورتال «حالىق گازەتىندە» جارىق كوردى. نۇرسۇلتان نازاربايەۆتىڭ «تاۋەلسىزدىك ءداۋىرى» كىتابىنىڭ ەلەكتروندىق نۇسقاسى akorda.kz سايتىنداعى مەملەكەت باسشىسىنىڭ دەربەس پاراقشاسىنا جاريالاندى دەلىنگەن قىتايلىق باسىلىمدا.
بۇل حاباردا كىتاپتىڭ قىتاي مەن قازاقستان اراسىنداعى ساياسي، ەكونوميكالىق قارىم-قاتىناستارى تۋرالى بولىمىنە ايىرىقشا توقتالادى.
«اتاپ ايتار بولساق، «تاۋەلسىزدىك داۋىرىندە» قازاقستان قىتايمەن بولعان جان-جاقتى ستراتەگيالىق، سەرىكتەستىك قاتىناسىنىڭ دامۋىنا اسا ءمان بەرەتىنىن، قازاقستان مەن قىتاي ەكونوميكا جانە ساياسي جاقتا تاتۋ كورشى، سەنىمدى دوس جانە سەرىكتەس ەل ەكەنىن ايتادى»، دەلىنگەن اقپاراتتا.
ن. نازاربايەۆتىڭ كىتابىندا ەكى ەلگە ورتاق «جىبەك جولى» ەكونوميكالىق بەلدەۋى اياسىندا «نۇرلى جول» باعدارلاماسى ارقىلى قازاقستان ءوز ەلىنىڭ اۋىل شارۋاشىلىق ونىمدەرىن قىتايعا ەكسپورتتاۋدا. ەلباسىنىڭ «تاۋەلسىزدىك ءداۋىرى» كىتابىندا جازىلعان «قىتايدان شىعىپ قازاقستان ارقىلى رەسەي، ەۋروپا، ورتالىق ازيا جانە كاسپيي تەڭىزى جاعالاۋىنداعى ەلدەرىنە قاتىنايتىن جۇك پويىزى تاسىمال مولشەرىنىڭ جىل سايىن ارتىپ بارا جاتقانىنا دا توقتالادى» People Daily.
سونداي-اق، قىتاي مەن ەۋروپا ەلدەرى ورتاسىنداعى جۇك تاسىمالىنا قولايلى بولۋ ءۇشىن، قازاقستاننىڭ كاسپي تەڭىزى جاعالاۋىنان ارنايى پورت سالعانىن، قازاقستان مەن قىتاي شەكاراسىنا ورنالاسقان «قورعاس» وتكەلىنىڭ قىتاي مەن ورتالىق ازياداعى بارلىق ەلدەردى ءوزارا تۇتاستىرعانى جازىلعانىن، ءسوز ەتەدى اتالعان اقپاراتتىق پورتال.
قازاق جىگىتى «قىتايدىڭ بوكس كورولى» اتاندى - «جەنمين جيباو» (People Daily)
جىل سايىنعى قىتايدىڭ «بوكس كورولى» چەمپيوناتىنىڭ 2017-جىلعى دوداسى قورىتىندىلاندى. بۇل تۋرالى وسى اپتادا People Daily سايتى حابارلادى.
6- قاڭتار كۇنى حاڭجوۋ قالاسىندا 75 كەلىگە دەيىنگى سالماقتا كەزدەسۋلەر ءوتىپ، شىنجاڭدىق قازاق بوكس شەبەرى توقتاربەك تاڭاتقان وسى دودانىڭ چەمپيونى ۋىن ينحاڭدى ۇتىپ، «كورول» چەمپيوندىق بەلدىگىن جەڭىپ الدى.
People Daily پورتالىنىڭ حابارلاۋىنشا، ونىڭ بۇل جولعى قارسىلاسى ۋىن ينحاڭ بۇدان بۇرىن تيانجيندە وتكەن بوكستان ەل بىرىنشىلىگىندە 75 كەلىگە دەيىنگى سالماق ساناتى بويىنشا التىن مەدال يەگەرى، سونىمەن قاتار وسى ءتۋرنيردىڭ ەكى مارتە «قىتايدىڭ بوكس كورولى» اتانعان. ال توقتاربەك تاڭاتقان كەيىن شىققان بوكسشى. ول بۇعان دەيىن وسى اتالعان جارىسقا قاتىسىپ، كۇمىس مەدال ەنشىلەگەن. ونىڭ سول كەزدەگى قارسىلاسى دا ءدال وسى ۋىن ينحاڭ بولعان ەكەن.
«بۇل جولعى 8 راۋندقا سوزىلعان ايقاستا تورەشىلەر 2:1 دەگەن ەسەپپەن توقتاربەك تاڭاتقانعا 2017-جىلعى بوكستان قىتايداعى «بوكس كورولى» اتاعىن بەرگەن» دەپ تۇيىندەگەن قىتايلىق اقپارات كوزى «جەنمين جيباو».
قازاق وتباسى قومنان «دينانىڭ ءۇيى» اتتى ساياحات ءۇيىن اشتى - تيان-شان پورتالى
قىتايداعى قازاقتار مەكەندەيتىن التاي ايماعى، بۋىرشىن اۋدانىنا قاراستى ايگىلى ساياحات ءوڭىرى سانالاتىن «قاناس كولى» ماڭى قىس كۇندەرى دە تۋريستەردىڭ اياعى ۇزىلمەيتىن قۇتتى مەكەنگە اينالىپ وتىر. بۇنداي اقپارات وسى اپتادا تيان-شان پورتالىندا حابارلانعان بولاتىن.
وسىعان وراي قازاق باقتاشىسى جەكەن قازىر ساياحات كاسىبىنە بەيىمدەلىپ، قوم قىستاعىنداعى سۇلۋ شوقىنىڭ ەتەگىنەن «دينانىڭ ءۇيى» اتتى ساياحات ءۇيىن اشقان.
«2017-جىلى قاراشادان قازىرگە دەيىن 400 گە جۋىق قوناق قابىلداعان قازاق وتباسىنىڭ بۇگىندە كىرىسى ەسەلەپ ارتقان»، - دەپ جازادى اتالعان اقپاراتتىق پورتال.
جەكەن مەن جۇبايى ساۋلەن ءدامى ءتىل ۇيىرەتىن جىلقى ەتى مەن قايماقتى شايدى ازىرلەپ، تۋريستەردىڭ تالعامىنا قاراي تاعام تۇرلەرىن دە مولايتۋدا. ولاردىڭ ايتۋىنشا، جاقىنعى جىلداردان بەرى، ساياحات وڭىرىنەن تاپقان كىرىسى كۇن ساناپ ءوسىپ، قازىر «جۇماق مەكەن» اتانعان قاناستىڭ جازى عانا ەمەس، ءتورت ماۋسىمىنىڭ ءبارى دە ساياحاتتىڭ سارا مەزگىلىنە اينالعان.
اتالعان اقپارات كوزىنىڭ مالىمەتىنشە، ايگىلى تۋريستىك ورتالىقتا جەرگىلىكتى ورىن، جاڭا قولعا الىنعان «قىسقى ساياحات» جوباسى اق كورپەسىن جامىلىپ، مۇلگىپ جاتقان «قاناس كولى» ماڭىن ۇيقىسىنان وياتىپ، سوندا مەكەندەيتىن تۇرعىلىقتى قازاقتارعا تىڭ تىرشىلىك سىيلاپتى.
«وسىنداي ورايلى ءساتتى مىقتى يگەرگەن جەرگىلىكتى تۇرعىندار الىس وڭىردەن كەلگەن وزگە ۇلت وكىلدەرىنە قازاقى سالت-سانا مادەنيەتىن تانىستىرادى ءارى قار بايلىعىنان ءتيىمدى پايدالانىپ، قار بەتىندەگى قىزىقتى ۇلتتىق جانە سپورتتىق شارالاردى دا وتكىزىپ وتىر» دەپ تۇيىندەيدى kz.ts.cn.
يران مەن قازاقستان بىردەي وركەنيەتتىك شەڭبەردە ورنالاسقان - Pars اقپارات اگەنتتىگى
يران يسلام رەسپۋبليكاسىنىڭ قازاقستانداعى ەلشىسى تەھران- استانانىڭ ءتۇرلى سالالارداعى قارىم-قاتىناستارىنىڭ سەرپىندى جانە ءوزارا ءتيىمدى مۇددەلەرگە نەگىزدەلگەنىن ايتتى. قازاقستاندىق گازەتكە بەرگەن يران يسلام رەسپۋبليكاسىنىڭ قازاقستانداعى ەلشىسى مودجتابا دەميرچيلۋدىڭ سۇحباتىنداعى ەڭ نەگىزگى ويلارىن تۇيىندەگەن يراندىق باسىلىم وسىنداي اقپارات جاريالادى.
يران يسلام رەسپۋبليكاسىنىڭ قازاقستانداعى ەلشىسى قازاق-يران قارىم-قاتىناسى مەن ورتاق رۋحاني ۇندەستىك بىرنەشە عاسىردان بەرى جالعاسىن تاۋىپ كەلە جاتقانىن ايتقان. «1992-جىلدىڭ قاڭتار ايىنىڭ 29 ى كۇنى يران مەن قازاقستان اراسىندا ديپلوماتيالىق قاتىناستار ورنادى. بۇل شىن مانىندە بىرنەشە عاسىر بۇرىن يراندىقتار مەن قازاقتار اراسىندا بولعان قاتىناستاردى قايتا جانداندىرۋ سانالادى»، - دەلىنگەن اگەنتتىكتە.
مودجتابا دەميرچيلۋ مىرزا يران مەن قازاقستان اراسىنداعى مادەني بايلانىستاردى ورتاق تاريح، ورتاق ءدىن، پارسى جانە قازاق تىلدەرىندە كەزدەسەتىن ورتاق سوزدەردەن بايقاۋعا بولاتىنىن ايتقان.
«يران مەن ورتالىق ازيا مەملەكەتتەرىنىڭ، اسىرەسە قازاقستانمەن مادەني جانە تاريحي بايلانىستارىنىڭ وتكەنى تەرەڭدە جاتىر. يران مەن قازاقستان بىردەي وركەنيەتتىك شەڭبەردە ورنالاسقان دەپ ايتۋعا بولادى»، - دەگەن ەلشى سوزىمەن تۇيىندەگەن parstoday.com.
التىنگۇل بولات قىزىنىڭ قازاق مادەنيەتى تۋرالى كىتابى موڭعول تىلىندە جارىق كوردى - KAZNEWS
دوكتور، پروفەسسور التىنگۇل بولات قىزىنىڭ «قازاق حالقىنىڭ مادەنيەتى، سالت-ءداستۇرى»، «فرانسيانىڭ موڭعولتانۋى» اتتى كىتاپتارى موڭعول تىلىندە جارىق كوردى. وندا كوشپەلى قازاق حالقىنىڭ ءومىرى ونىڭ مادەنيەتى مەن سالت ءداستۇرى كورىنىس تاپقان. ۇلتىمىزدىڭ مادەنيەتى تۋرالى بۇنداي جاعىمدى جاڭالىق موڭعوليالىق kaznews.mn پورتالىندا جارىق كوردى.
اتالعان اقپارات كوزىنىڭ مالىمەتىنشە، التىنگۇل بولات قىزى ءوزىنىڭ «قازاق حالقىنىڭ مادەنيەتى، سالت-ءداستۇرى» اتتى كىتابىندا قازاقي سالت-ءداستۇردىڭ ەرەكشەلىكتەرىن اتاپ كورسەتكەن. سونىمەن قاتار، «فرانسيانىڭ موڭعولتانۋى» اتتى كىتابىندا موڭعولتانۋشى عالىمداردىڭ ءومىربايانى مەن ەڭبەكتەرى جازىلعان.
دوكتور، پروفەسسور التىنگۇل بولات قىزى موڭعوليانىڭ ۇلتتىق ۋنيۆەرسيتەتىندە فرانسۋز جانە رۋمىن تىلدەرى كافەدراسىنىڭ مەڭگەرۋشىسى قىزمەتىن اتقارادى.
اۆتور: بەيسەن سۇلتان
