قازاقتىڭ تۇڭعىش وليمپيادا چەمپيونى: زەينەت جاسىندا ۇيدە وتىرا المادىم

استانا. قازاقپارات - مادەنيەت جانە سپورت ءمينيسترى ارىستانبەك مۇحامەدي ۇلى ك س ر و باسكەتبولىنىڭ جارىق جۇلدىزى، قازاقتىڭ تۇڭعىش وليمپيادا چەمپيونى ءالجان جارمۇحامەدوۆپەن كەزدەستى، دەپ حابارلايدى قازاقپارات.

«كەزەكتى رەت اتاجۇرتقا كەلىپ وتىرمىن. بۇگىن مينيسترمەن جاقسى كەزدەسۋ ءوتتى جانە سپورتقا قاتىستى ءوزارا پىكىر الماستىق. وسى ءساتتى پايدالانا وتىرىپ، قازاق سپورتىنا ساتتىلىك تىلەيمىن. جاستارى بيىك شىڭداردى باعىندىرىپ، قازاقستاننىڭ مارتەبەسىن كوتەرە بەرسىن»، - دەپ تىلەگەن ءبىلدىردى ارداگەر باسكەتبولشى.

سونىمەن قاتار ءالجان جارمۇحامەدوۆ كەشە استانادا 1972 -جىلعى وليمپيادا كەزىندە ك س ر و باسكەتبولشىلارىنىڭ جەڭىسىنە ارنالعان «دۆيجەنيە ۆۆەرح» اتتى فيلمنىڭ كورسەتىلىمىنە قاتىسقانىن ەسكە سالىپ ءوتتى.

 «بۇل فيلم 1972 -جىلى ميۋنحەندە تاريحي فينالدىق ماتچكە ارنالعان. سول كەزدە ك س ر و سپورتشىلارىنىڭ قۇرامىندا مەن دە بولعان ەدىم. فيلمدى تاماشالاۋ بارىسىندا كورەرمەندەر تاراپىنان ۇلكەن قىزىعۋشىلىق بولعانىن بايقادىم. زالعا كەلگەن ءاربىر كورەرمەن مەنىمەن امانداسىپ، فوتوسۋرەتكە تۇسۋگە تىرىستى. وسىنداي جىلى شىراي تانىتقان قانداستارىما العىسىمدى ايتقىم كەلەدى»، - دەيدى ك س ر و باسكەتبولىنىڭ جارىق جۇلدىزى.

ونىڭ ايتۋىنشا، ونىڭ ەكى ۇلى دا سپورت ينستيتۋتىن ءتامامداعان. وسى ۋاقىتقا دەيىن ۇلكەن ۇلى وليمپيادا رەزەرۆىنىڭ بالالار سپورت مەكتەبىندە قىزمەت ەتكەن. قازىرگى كەزدە ول تولىقتاي كاسىپكەرلىككە بەتبۇرىس جاساعان ەكەن. ال ەكىنشى ۇلى «حيمكي» باسكەتبول كلۋبىندا جاستار كومانداسىن جاتتىقتىرىپ ءجۇر.

«زەينەتكەرلىككە شىققانمەن، ۇيدە وتىرا المادىم. ءومىر بويى قوزعالىستا بولعان ادام رەتىندە سپورتتان الىستاۋ ماعان وتە اۋىر ءتيدى. سوندىقتان ەرتەدە مەنىڭ بالالارىم وقىعان مەكتەپتەن الىس ەمەس جەردە جەتكىنشەكتەردى باسكەتبول ويناۋعا باۋلىدىم. قازىرگى كەزدە دە سوندا قىزمەت ەتىپ ءجۇرمىن. مەن بۇگىن اۋا رايىنا قاراپ، الاڭداپ وتىرمىن. سەبەبى ەرتەڭ ساعات 11:45-تە وتەتىن جاتتىعۋعا ۇلگەرۋىم كەرەك»، - دەيدى ءالجان مۇسىربەك ۇلى.

ءا. جارمۇحامەدوۆ 1944 -جىلى 2 - قازاندا وڭتۇستىك قازاقستان وبلىسىندا دۇنيەگە كەلگەن. ك س ر و- نىڭ ەڭبەك سىڭىرگەن سپورت شەبەرى. 1970-1974 جانە 1976-1980 -جىلدار ارالىعىندا ك س ر و- نىڭ، 1972 -جىلى ميۋنحەندەگى (گەرمانيا)، 1980 - جىلى ماسكەۋدەگى (رەسەي) وليمپيادالىق ويىندارىنىڭ، 1967، 1971 جانە 1979 -جىلدارى ەۋروپانىڭ چەمپيونى. قازىرگى كەزدە قازاق چەمپيونى ماسكەۋدە تۇرادى. ۆلاديسلاۆ ەسىمدى ۇلىمەن بىرگەن بالالار مەن جاسوسپىرىمدەرگە ارنالعان «لاۋرۋس» باسكەتبول كلۋبىن قۇردى.

اۆتور: رۋسلان عابباسوۆ