الماتى وبلىسىنداعى تاۋلاردا ءۇش رەت قار كوشكىنى بولدى

استانا. قازاقپارات - الماتى وبلىسىنداعى تاۋلاردا ءۇش رەت قار كوشكىنى بولدى، دەپ حابارلايدى «قازگيدرومەت» ر م ك.

«وتكەن تاۋلىكتە قازاقستاننىڭ بارلىق تاۋلى اۋماقتارىندا قار جاۋدى. ەڭ بيىك قار جامىلعىسى ىلە الاتاۋىندا بولىپ، ونىڭ بيىكتىگى 21 سانتيمەتردى قۇرادى. قاردىڭ تۇسۋىنە بايلانىستى اۋا تەمپەراتۋراسى تومەندەپ، 8-24° اياز بولدى. 11- قاڭتار كۇنى كىشى الماتى وزەنىنىڭ باسسەينىندە ءۇش رەت شاعىن قار كوشكىنى بايقالدى»، - دەلىنگەن حابارلامادا.

تاياۋ كۇندەرى (12-13- قاڭتار) قازاقستاننىڭ تاۋلى اۋماقتارىندا قار كوشكىنى بولمايدى. 14- قاڭتاردا اۋا رايىنا بايلانىستى الماتى وبلىسىنىڭ تاۋلى اۋماقتارىندا قار كوشكىنى بولۋى مۇمكىن.