ازات پەرۋاشەۆ: پرەزيدەنت قارجى سەكتورىن وڭالتۋدا ناقتى تاپسىرما بەردى
بۇل تۋرالى ول دەموكراتيالىق كۇشتەردىڭ «قازاقستان-2050» جالپى ۇلتتىق كواليتسياسىنىڭ ەلباسى جولداۋىنا ارنالعان كەزەكتى وتىرىسىندا ءمالىم ەتتى، دەپ حابارلايدى قازاقپارات ءتىلشىسى.
«قارجىلىق جۇيەنى تۇراقتاندىرۋ بويىنشا مەملەكەت باسشىسىنىڭ تاپسىرماسى اسا ماڭىزدى. 2014-جىلدان بەرى «اقجول» پارتياسى جەكە تۇلعالاردىڭ بانكروتتىعى تۋرالى زاڭدى ازىرلەۋ جانە قابىلداۋ تۋرالى ۇكىمەتكە بىرنەشە رەت ۇسىنىس تاستاعان ەدى»، - دەيدى ازات پەرۋاشەۆ.
دەپۋتات ساتسىزدىككە ۇرىنعان نەسيەلەۋشىلەردى بانكروت دەپ مويىنداپ، ولاردان بار سالماقتى الىپ تاستامايىنشا، بانكتەردى وڭالتۋدىڭ مۇمكىن ەمەستىگىن باسا ايتتى.
«اڭگىمە ءبىر كەزدەرى نەسيە الىپ، تولەي الماي، كوشەدە قالعان ازاماتتار جونىندە بولىپ وتىر. ال ۇلتتىق بانك ۇنەمى كەرەك، كەرەك ەمەس، 3 جىلدان كەيىن، 5 جىلدان كەيىن دەپ جاۋاپ بەرەتىن. بۇل جولى پرەزيدەنت ناقتى تاپسىرما بەرىپ، نۇكتەسىن قويىپ وتىر. جەكە تۇلعالاردىڭ بانكروتتىعى تۋرالى زاڭدى قابىلداۋ پروتسەسىن جەدەلدەتۋ قاجەت»، - دەدى ازات پەرۋاشەۆ.
سونداي-اق، ماجىلىسمەن جولداۋدا بانك سەكتورىنان بولەك، قور نارىعىنىڭ دامۋى ءۇشىن بريتاندىق زاڭ نەگىزىندە جۇمىس ىستەيتىن استانا حالىقارالىق قارجى ورتالىعىنىڭ دامۋى جونىندە دە ايتىلعانىن ەرەكشە اتاپ ءوتتى.
ايتا كەتەيىك، بەيبىتشىلىك جانە كەلىسىم سارايىندا وتكەن دەموكراتيالىق كۇشتەردىڭ «قازاقستان-2050» جالپى ۇلتتىق كواليتسياسىنىڭ كەزەكتى وتىرىسى مەملەكەت باسشىسىنىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىنا ارنالدى. جيىندا ەلدەگى جەتەكشى پارتيالاردىڭ باسشىلارى، پارلامەنت دەپۋتاتتارى، قازاقستان حالقى اسسامبلەياسى جانە ءبىرقاتار قوعامدىق ۇيىمداردىڭ وكىلدەرى جىلدىڭ باستى قۇجاتىن تالقىلادى.
دەموكراتيالىق كۇشتەردىڭ «قازاقستان-2050» جالپى ۇلتتىق كواليتسياسى «نۇر وتان» پارتياسىنىڭ باستاماسىمەن قۇرىلدى. ول 5 ساياسي پارتيانىڭ، 17 ءىرى قوعامدىق بىرلەستىكتىڭ جانە 500 دەن استام ۇكىمەتتىك ەمەس ۇيىمداردىڭ باسىن بىرىكتىرەدى.
اۆتور: ايجان سەرىكجان قىزى
