كاسىپقوي بوكسشى باتىر جۇكەمبايەۆ اتىنداعى بوكس زالى اشىلدى
بۇل تۋرالى بوكسشى ءوزىنىڭ ۆكونتاكتە الەۋمەتتىك جەلىسىندە جازدى.
«جاڭا جىل قۋانىشتى حابارمەن باستالدى. كەشە اقتاۋ قالاسىندا باتىر جۇكەمبايەۆتىڭ اتىنداعى «باتىر 777» اتتى جاڭا بوكس زالى اشىلدى. قازىرگى تاڭدا سپورت كەشەنىندە ءوڭىردىڭ 200 دەن اسا بولاشاق چەمپيونى جاتتىعۋدى باستاپ كەتتى.
قازاقتا بۇلاق كورسەڭ كوزىن اش دەگەن ءسوز بار عوي. سول سياقتى، ءبىزدىڭ ماقسات - تاسادا جۇرگەن جاس تالانتتاردى تاۋىپ، جاتتىعۋ جاساۋىنا مۇمكىندىك جاساپ، ولاردىڭ جولىن اشۋ. سونداي-اق، جاستارىمىزدى سپورتقا، سالاماتتى ءومىر سالتىن ۇستانۋعا شاقىرۋ ەدى. جاڭا بوكس زالىمىز قۇتتى ءھام قايىرلى بولعاي»، - دەپ جازىلعان الەۋمەتتىك جەلىدە.
ەستەرىڭىزگە سالا كەتەيىك، باتىر جۇكەمبايەۆ كاسىپقوي بوكستا 11 جەكپە-جەك وتكىزىپ، بارلىعىندا جەڭىسكە جەتتى. ونىڭ 9 ىن مەرزىمىنەن بۇرىن اياقتاعان. ول - جارتىلاي ورتا سالماقتا «IBO International» چەمپيوندىق اتاعىنىڭ يەگەرى.
اۆتور: كۇنسۇلتان وتارباي
