جاۋىن تۇرلەرى ءھام اتاۋلارى

استانا. قازاقپارات - جاڭبىر - بۇلتتان ءبولىنىپ، جەرگە تۇسەتىن اتموسفەرالىق سۋ تامشىلارى، توساپ.

اق جاڭبىر - ءبىرقالىپتا تولاسسىز ۇزاق جاۋاتىن جاڭبىر.

بوز جاڭبىر - جاڭبىردىڭ باياۋ، سىلبىرەگى جاۋاتىن ءتۇرى.

بۇرشاق - مۇز كۇيىندە تۇسەتىن كىشكەنە دومالاق تۇيىرشىك، اتموسفەرالىق جاۋىن- شاشىن.

بۇرشاق جاڭبىر - اتموسفەرالىق سۋ تامشىلارىنىڭ سالقىندىقتان كىشىگىرىم بۇرشاققا اينالىپ جاۋۋى.

بىلعارى بۇركۋ - اتموسفەرالىق توساپتىڭ تامشىلاماي بۇركۋى.

قارا جاڭبىر - كۇزگى قالىڭ جاڭبىر.

قارلى جاڭبىر - ەرتە كوكتەمدەگى جانە كۇزدەگى قار ارالاس جاۋىن.

مۇزاق - جاڭبىر تامشىلارىنىڭ جەرگە مۇز بولىپ ءتۇسۋى.

نوسەر - توگىپ- توگىپ جاۋىپ، تەز اياقتالاتىن بۋداق جاڭبىر.

وتكىنشى جاڭبىر - اسپان كۇمبەزى كوشپەلى الا بۇلتتانىپ، تەز جاۋىپ وتەتىن جاڭبىر.

سوقىر جاۋىن - كۇن كەزى شىعىپ تۇرعاندا جاۋاتىن ۇساق تامشىلى وتكىنشى جاڭبىر.

سىلبىر جاڭبىر - جەلسىز كۇنگى جاي جاڭبىر.

سىركىرەۋ - ەتە باياۋ سەبەزگىلەپ جاۋۋ.

سىرلەتۋ - جاڭبىردىڭ بۇركۋدەن، سىركىرەۋدەن مول، نوسەردەن سايابىر جاۋۋى.

سەبەزدەۋ - جايلاپ بۇركۋ، باياۋلاپ جاۋۋ.

سىلبىلەۋ - جاڭبىردىڭ جايلاپ ۇزاق جاۋۋى.

سەل - قار مەن مۇزدىڭ ەرۋىنەن نەمەسە قاتتى نوسەردىڭ سالدارىنان بولاتىن سۋ تاسقىنى.

سىركىرەمە - ەتە ۇساق تامشى تۇرىندە تۇسەتىن مايدا جاۋىن.

شىق - سۋىق تۇندەردە جانە تاڭەرتەڭ توپىراق بەتىنە نە ءشوپ باسىنا تۇرىپ قالاتىڭ مولدىرەگەن تامشى سۋ، اتموسفەرالىق دىمقىل.

كەمپىرقوساق - جاڭبىردان كەيىن اسپان كۇمبەزىندە ءتۇرلى- ءتۇستى دوعا تۇرىندە كورىنەتىن جولاق، اتموسفەراداعى وپتيكالىق قۇبىلىس.

قوس كەمپىرقوساق - كۇن ساۋلەسى جاڭبىر تامشىسىنا بەلگىلى ءبىر بۇرىش جاساي ءتۇسىپ، ونىڭ ىشىندە ەكى رەت شاعىلىسۋى ناتيجەسىندە قاباتتاس تۇسكەن ەكىنشى كەمپىرقوساق.

اي كەمپىرقوساق - تۇنگى اي ساۋلەسىنىڭ وسىنداي اسەرىنەن پايدا بودعان كەمپىرقوساق.

وشاعان - كەمپىرقوساقتىڭ كونە اتاۋى.

نايزاعاي - بۋداق جاڭبىر بۇلتتارىنان نە قاتپارلى جاڭبىر بۇلتتارىنان داۋىل كەزىندە پايدا بولاتىن اسا كۇشتى ەلەكتر ۇشقىندارى.

كۇركىر - بۇلتتى كۇندەرى نايزاعاي جارقىلداعاندا پايدا بولاتىن جاڭعىرىققان قاتتى دىبىس.

 

دەرەككوزى: http://qazaq-el.narod.ru/