ەلوردا اكىمى ساباقتىڭ بولمايتىنى جايىندا قايدان بىلۋگە بولاتىنىن ايتىپ بەردى

استانا. قازاقپارات - استانا قالاسىنىڭ اكىمى اسەت يسەكەشەۆ اۋا رايىنىڭ قولايسىزدىعىنا بايلانىستى مەكتەپتە ساباقتىڭ بولۋ-بولماۋىنا قاتىستى اقپاراتتى قايدان الۋعا بولاتىنىن ايتىپ بەردى، دەپ حابارلايدى قازاقپارات.

بۇل تۋرالى اكىم فەيسبۋكتەگى پاراقشاسىندا جازدى.

قازگيدرومەتتىڭ اقپاراتى بويىنشا، تۇندە تاعى دا قار جاۋىپ، سەكۋندىنا 15 مەترگە دەيىن جەل بولۋى مۇمكىن. ماماندار تاڭەرتەڭ جەلدىڭ كۇشى ازايىپ، اۋا تەمپەراتۋراسى 15 گرادۋسقا دەيىن تومەندەيدى دەپ وتىر.

«ەرتەڭ، تاڭعى 6.00 دەن باستاپ ادەتتەگى الگوريتم بويىنشا ساباقتىڭ بولۋ نە بولماۋى بويىنشا حابار تاراتىلاتىن بولادى. ولاردى مىنا سىلتەمەلەر ارقىلى - 109 (تەگىن موبيلدى قوسىمشاسى) ، www.bilim.astana.kz سايتىنان، سىنىپ جەتەكشىسىنەن نە مەكتەپ اكىمشىلىگىنەن، سمارت استانا قوسىمشاسى ارقىلى بىلۋگە بولادى»، - دەپ جازدى ءا. يسەكەشەۆ.

ەسكە سالا كەتسەك، بۇعان دەيىن اكىمدىكتىڭ باسپا ءسوز قىزمەتى، عالامتوردا 12- قاڭتار كۇنى ساباق بولمايدى دەگەن اقپاراتتى جوققا شىعارعان ەدى.