كوكشەتاۋدا ۇزدىك جامبى اتۋشى انىقتالدى

كوكشەتاۋ. قازاقپارات - كوكشەتاۋدا ۇلتىق ويىن جامبى اتۋ بويىنشا تۋرنير وتكىزىلدى، دەپ حابارلايدى قازاقپارات ءتىلشىسى.

اقمولا وبلىسىنىڭ دەنە شىنىقتىرۋ جانە سپورت باسقارماسىنىڭ مالىمەتى بويىنشا كوكشەتاۋدىڭ ىرگەسىندەگى كراسنويار كەنتىندە ۇلتتىق سپورت تۇرلەرى بويىنشا بالۋان شولاق اتىنداعى بالالار مەن جاسوسپىرىمدەردىڭ سپورت مەكتەبى ۇيىمداستىرعان تۋرنير بارىسىندا تورەشىلەر جىگىتتەردىڭ جىلدامدىعى مەن مەرگەندىگىنە باعا بەردى.

جارىسقا 30 جۋىق جىگىت قاتىسىپ، شەبەرلىكتەرىن ورتاعا سالدى. وقۋشىلار اراسىندا داۋلەتحان راحمان ۇزدىك اتانسا، ەرەسەكتەر اراسىندا نۇرسۇلتان ءجۇسىپالين جەڭىمپاز دەپ تانىلدى.

ەسكە سالا كەتەيىك، جامبى اتۋ - قازاقتىڭ كونە ويىندارىنىڭ ءبىرى سانالادى. اتتىڭ ۇستىندە شاۋىپ كەلە جاتقان ادام ساداعىمەن نىساناعا تىگىلگەن جامبىنى اتىپ تۇسىرگەن. جامبى رەتىندە كۇمىس نەمەسە التىننان جاسالعان تايتۇياقتار نەمەسە تەڭگەلەر تىگىلىپ وتىرعان. جامبىنى اتىپ تۇسىرگەن جىگىت سول جامبىنى سىي رەتىندە وزىنە قالدىراتىن بولعان.

ەسكە سالا كەتسەك، 2013 -جىلى استانا قالاسىندا «تۇرىك حالىقتارىنىڭ ۇلتتىق ويىندارى حالىقارالىق قاۋىمداستىعى» قۇرىلدى. وعان قازاقستان، تاجىكستان، وزبەكستان، تۇركيا، ازەربايجان، ماجارستان جانە قىرعىزستان ەلدەرى كىردى.