پويىزدىڭ ۇستىمەن بيلەتسىز جەتىپ قالماق بولعان كوكشەتاۋلىق جانساقتاۋ بولىمىنە ءتۇستى

استانا. قازاقپارات - كوكشەتاۋ تۇرعىنى بيلەتكە اقشا جۇمساماي استاناعا ەلتەكتروۆوزدىڭ ۇستىندە جەتىپ قالماق بولعان ارەكەتى ءساتسىز اياقتالدى، ول اۋىر كۇيدە جانساقتاۋ بولىمىنە ءتۇستى، دەپ حابارلايدى قازاقپارات «ك ت ك» تەلەارناسىنا سىلتەمە جاساپ.

25 جاستاعى جىگىتكە استانا جەدەل جەتۋ كەرەك بولعانىمەن، جولىنا اقشا تابا الماعان. ول بيلەتسىز جەتۋدى ويلاعان. سول ءۇشىن پويىزدىڭ ۇستىنە شىعىپ العان، الايدا الىسقا بارمادى. كوكشەتاۋ ستانساسىندا ونى 29 مىڭ ۆولت توق سوققان. دەنەسىنىڭ 45 پايىزىن كۇيىك شالعان جىگىتتى اۋرۋحاناعا جەتكىزدى.

دارىگەرلەر ونىڭ جاعدايى وتە اۋىر دەپ وتىر.

«جاعدايىنا بايلانىستى جىگىت جانساقتاۋ بولىمىندە جاتىر. ونىڭ حالى اۋىر دەپ باعالانۋدا، ارى قاراي ديناميكاسىن باقىلاۋدا ۇستايمىز»، - دەيدى اقمولا وبلىستىق اۋرۋحاناسىنىڭ تراۆماتولوگ دارىگەرى ەلدوس قايىرجانوۆ.