قايرات قوجامجاروۆ قازاقستاندىق پروكۋرورلارعا ۇندەۋ جاريالادى
«ەلدىڭ ستراتەگيالىق تۇرعىدا دامۋىنىڭ باسىم باعىتتارىنىڭ ءبىرى رەتىندە ۇلت كوشباسشىسى زاڭنىڭ ۇستەمدىگى مەن سىبايلاس جەمقورلىققا قارسى كۇرەستى جەكە اتاپ وتەدى. قازىرگى ۋاقىتتا اتالعان تاپسىرما بارلىق قۇقىق قورعاۋ ورگاندارى جۇمىسىنىڭ باستى باعدارى بولىپ تابىلادى. ەڭ الدىمەن، نۇرسۇلتان ءابىش ۇلى بۇگىنگى تاڭدا زاڭنىڭ ۇستەمدىگى ءۇشىن سوت جانە قۇقىق قورعاۋ جۇيەلەرىندەگى ينستيتۋتسيونالدىق وزگەرىستەردىڭ ماڭىزىن ەرەكشە اتاپ ءوتتى»، - دەيدى ق ر باس پروكۋرورى.
قايرات قوجامجاروۆ اتاپ وتكەندەي، پرەزيدەنتتىڭ باستاماسى بويىنشا وتكەن جىلى زاڭ قابىلدانىپ، قۇقىق قورعاۋ سالالارى ايتارلىقتاي جاڭعىرتىلعان. الداعى ۋاقىتتا دا بارلىق قۇقىق قورعاۋ ورگاندارى پرەزيدەنتتىڭ تاپسىرماسىن جۇزەگە اسىرۋعا كۇش سالاتىن بولادى.
«ءوز كەزەگىندە پروكۋراتۋرا ورگاندارى باقىلاۋدى كۇشەيتۋ ارقىلى ءوز مىندەتتەرىن ورىنداپ، سىبايلاس جەمقورلىققا قارسى كۇرەس پەن قۇقىق بۇزۋشىلىقتاردىڭ الدىن الۋ باعىتىندا ورگانداردىڭ جۇمىسىن ۇيلەستىرەتىن بولادى. سىزدەردىڭ نازارلارىڭىزدى ءتورتىنشى ونەركاسىپتىك ريەۆوليۋتسيا جاعدايىندا قۇقىق قورعاۋ جۇيەسىن سيفرلىق تەحنولوگيالارسىز دامىتۋ مۇمكىن ەمەس ەكەنىنە اۋدارعىم كەلەدى. وسىعان بايلانىستى قىلمىستىق سوت ءىسى كەزەڭ-كەزەڭمەن ەلەكتروندى فورماتقا كوشىرىلەدى. سيفرلاندىرۋ ءبىزدىڭ حالىقپەن قارىم-قاتىناس جاساۋ سالاسىن دا قامتيدى. بۇل ارتىق بولىپ وتىرعان اكىمشىلىك كەدەرگىلەردىڭ كوزىن جويادى»، - دەيدى قايرات قوجامجاروۆ.
ونىڭ سوزىنە سۇيەنسەك، زاڭدى جانە جەكە تۇلعالاردىڭ ءوتىنىشىنىڭ لايىقتى ءارى ۋاقتىلى شەشىلۋى ازاماتتاردىڭ قۇقىقتارىنىڭ قورعالۋىنىڭ ءتيىمدى قۇرالى بولا ءبىلۋى كەرەك. ول ءۇشىن كەلەشەكتە قۇقىق قورعاۋ قىزمەتتەرىنىڭ ورتالىقتارىنىڭ جۇمىسى كۇشەيتىلمەك.
«ءبىزدىڭ جۇمىسىمىزدىڭ باستى باعاسى - حالىقتىڭ سەنىمىنە يە بولۋ دەڭگەيىن ودان ارى كوتەرۋ»، - دەيدى ق ر باس پروكۋرورى.
اۆتور: ايان بەكەن ۇلى
