رەسەيلىك ساراپشى جولداۋ تۋرالى: قالالاردى دامىتۋ ماڭىزدى باعىتتاردىڭ ءبىرى
ساراپشىنىڭ ايتۋىنشا، ەلباسى جولداۋى قازىرگى الەمدىك ەكونوميكادا بايقالىپ جاتقان نەگىزگى ۇردىستەرمەن تىعىز بايلانىستى.
«ءبىز قازىر ادام كاپيتالى جانە تسيفرلىق تەحنولوگيالاردى دامىتۋدىڭ ماڭىزدىلىعىن كورىپ وتىرمىز. دامىعان ەلدەر اراسىندا وسى سالانى دامىتۋ بويىنشا ۇلكەن باسكەلەستىك ءجۇرىپ جاتىر. قازاقستان دامىعان 30 ەلدىڭ قاتارىنا كىرۋدى ماقسات ەتكەن ەل بولعاندىقتان، باعىتتى دۇرىس تاڭداپ وتىر»، - دەدى ياروسلاۆ ليسوۆوليك.
ساراپشىنىڭ ويىنشا، ادام كاپيتالىن دامىتۋ تۇرعىسىنان جولداۋداعى ءبىلىم جانە دەنساۋلىق سالاسىنا باسىمدىلىق بەرىلۋى وتە ماڭىزدى.
«سوڭعى ونجىلدىقتاعى بارلىق ەكونوميكالىق زەرتتەۋلەردىڭ نەگىزى ادام كاپيتالىنىڭ دامۋى بولىپ تابىلادى. ول ۇزاق مەرزىمدىك جوسپارلاردا ەكونوميكالىق ءوسۋ قارقىنىن ايقىندايتىن ەكونوميكالىق ءوسۋدىڭ كىلتى بولىپ تابىلادى. كوپتەگەن ەلدەردىڭ سوڭعى ونجىلدىقتاعى جەتىستىكتەرى ادام كاپيتالىن دامىتۋمەن بايلانىستى»، - دەدى يا. ليسوۆوليك
ياروسلاۆ ليسوۆوليك قازاقستان ءۇشىن دە، ەۋرازيا ايماعىنداعى بارلىق ەلدەر ءۇشىن دە الەۋەتتى ءوسۋ فاكتورلارىنىڭ ءبىرى بولىپ تابىلاتىن ەڭبەك ونىمدىلىگىنىڭ ارتۋىن اتاپ ءوتتى.
«قازاقستان پرەزيدەنتىنىڭ قالالاردى دامىتۋ باعىتى تۋرالى ايتقانى وتە ماڭىزدى. الەمدەگى الدىڭعى قاتارلى ماكروەكونوميكالىق كورسەتكىشتەردىڭ ەلدەر وسىعان كۇش سالۋدا. مەنىڭ ويىمشا بۇل وتە دۇرىس»، - دەدى ول.
جولداۋداعى قارجى سەكتورى مەن ماكروەكونوميكالىق تۇراقتىلىقتى دامىتۋ قاجەتتىلىگىنە توقتالىپ وتكەن ساراپشى «قازاقستان رەسپۋبليكاسىنىڭ پرەزيدەنتى شەشىمىن كۇتىپ تۇرعان ەڭ نەگىزگى ماسەلەلەردىڭ ءبىرىن دۇرىس اتاپ ءوتتى»، - دەدى.
«نەگىزىنەن، سوڭعى بىرنەشە جىل ىشىندە ماكروەكونوميكالىق كورسەتكىشتەر بويىنشا قازاقستان ءبىراز جەتىستىكتەرگە جەتتى. سوندىقتان پرەزيدەنت بەلگىلەگەن نەگىزگى ماقساتتارعا قول جەتكىزگەن كەزدە، قازاقستان ءوزىنىڭ ەكونوميكالىق ءوسۋ قارقىنىن ۇستاپ تۇرىپ قانا قويماي، ودان ءارى جەدەلدەتىپ، الەمدىك ەكونوميكانىڭ جەتەكشى ەلدەرىنىڭ قاتارىندا جوعارى ورلەۋ مۇمكىندىگىنە يە»، - دەپ اتاپ ءوتتى ساراپشى.
