جاقسىلىق دوسقاليەۆ تەگىن مەديتسينالىق كومەكتىڭ جاڭا ۇلگىسىن ءتۇسىندىرىپ بەردى

استانا. قازاقپارات - ق ر پرەزيدەنتى نۇرسۇلتان نازاربايەۆ بۇگىنگى جولداۋىندا مەملەكەتتىڭ مىندەتتەرىن ناقتى بەلگىلەي وتىرىپ، تەگىن مەديتسينالىق كومەكتىڭ كەپىلدىك بەرىلگەن كولەمىنىڭ جاڭا مودەلىن ازىرلەۋدى تاپسىردى، دەپ حابارلايدى قازاقپارات ءتىلشىسى.

اكادەميك جاقسىلىق دوسقاليەۆتىڭ ايتۋىنشا، مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا تەگىن مەديتسينالىق كومەكتىڭ كولەمىن وزگەرتۋگە تۋرا كەلەدى.

«قازىرگى كەزدە تەگىن مەديتسينالىق كومەك بار. وعان مەملەكەتتىڭ ءوزى كەپىلدىك بەرىپ وتىر. ونىڭ قۇرامىنا بارلىق مەديتسينالىق قىزمەتتەر كىرەدى. بىلايشا ايتقاندا، بۇگىندە ول قىزمەتتىڭ ءبارى بيۋدجەت ەسەبىنەن اتقارىلادى. ال مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزگەندە كەپىلدەندىرىلگەن مەديتسينالىق كومەك شەگەرىلەدى. ويتكەنى كەيبىر مەديتسينالىق قىزمەتتەر بيۋدجەتتەن ەمەس، ارنايى مەديتسينالىق قوردان تولەنەدى»، - دەدى ج. دوسقاليەۆ قازاقپارات تىلشىسىنە بەرگەن سۇحباتىندا.

 عالىمنىڭ ايتۋىنشا، تەگىن مەديتسينالىق كومەك شەگەرىلسە دە، ونىڭ نەگىزگى باعىتتارى قالا بەرەدى. «بىرىنشىدەن، ادام ومىرىنە قاۋىپ تونگەندە تەگىن مەديتسينالىق كومەك كورسەتىلەدى. وندايدا ساقتاندىرۋ كۋالىگىڭ بار ما، جوق پا، ەشكىم سۇرامايدى. ويتكەنى ادامدى قۇتقارۋ قاجەت. ەكىنشىدەن، ينفەكسيالىق اۋرۋلار كەزىندە تەگىن قىزمەت بولادى. سوسىن تۋبەركۋلەز سياقتى اۋرۋلار بار. ونى دا مەملەكەت ءوز موينىنا الىپ وتىر. ۇشىنشىدەن، سان الۋان پسيحيكالىق اۋرۋلار كەزدەسەدى. بۇدان بولەك، ۆاكسيناتسيا، سكرينينگ، ورفاندى، ياعني سيرەك كەزدەسەتىن اۋرۋلار، تەگىن دارىلەر جانە تاعى باسقا شارالار بيۋدجەتتىڭ ەسەبىنەن اتقارىلادى. پرەزيدەنتتىڭ ايتىپ وتىرعانى دا سول، كىمگە، قانداي جانە قاي كەزدە تەگىن مەديتسينالىق كومەك بەرىلەدى. سونىڭ ءبارىن رەتكە كەلتىرۋ كەرەك. قالعان مىندەتتى الەۋمەتتىك مەديتسينالىق ساقتاندىرۋعا بەرىپ تاستاۋعا بولادى»، - دەپ اتاپ كورسەتتى ج. دوسقاليەۆ.

ايتا كەتەيىك، «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋدا مەملەكەت باسشىسى عىلىمي ونكولوگيالىق ورتالىقتى قۇرۋ مىندەتىن دە بەلگىلەدى.

اۆتور: ارمان اسقاروۆ