ۇلى بريتانيانىڭ جاڭا ەلشىسى: قازاقستاننىڭ قوناقجايلىعىنا تاڭعالدىم
«استاناعا كەلگەنىمە بىرنەشە ساعات قانا بولدى. الايدا، قازىردىڭ وزىندە ەلدەرىمىزدىڭ قوناقجايلىعىنا تاڭعالدىم جانە مەن ءۇشىن وسى جەردە جۇمىسىمدى باستاۋ زور قۇرمەت. ءبىزدىڭ ەكىجاقتى قارىم-قاتىناسىمىزدىڭ دامۋ دەڭگەيى قۋانتادى جانە ونى ودان ارى تەرەڭدەتۋگە زور الەۋەت بار ەكەندىگىن كورىپ وتىرمىن»، - دەدى ەلشى بۇگىن اقوردادا قازاقستان پرەزيدەنتى نۇرسۇلتان نازاربايەۆقا سەنىم گراموتاسىن تاپسىرۋ راسىمىنەن كەيىنگى ب ا ق وكىلدەرىنە ارنالعان بريفينگتە.
ونىڭ ايتۋىنشا، ۇلى بريتانيا قازاقستان ەكونوميكاسىنا قارجى سالعان ينۆەستيتسيا كولەمى بويىنشا التىنشى ورىندا تۇر. ەلىمىز تاۋەلسىزدىك العان ۋاقىتتان بەرى ۇلى بريتانيا 20 ميلليارد دوللاردان استام ينۆەستيتسيا سالعان.
«مۇناي مەن گاز سالاسى عانا ەمەس، سونىمەن قاتار اۋىل شارۋاشىلىعى، ІТ- تەحنولوگيالار، قارجى سەكتورىن دامىتۋ سىندى سالالارىندا دا ەتەنە سەرىكتەسپىز. بريتاندىق كومپانيالار «استانا» حالىقارالىق قارجى ورتالىعىن ۇزاق مەرزىمدى قولداۋعا جۇمىلدىرىلعان. ا ح ق و- نىڭ قۇقىقتىق نەگىزى رەتىندە اعىلشىن قۇقىعىنىڭ قابىلدانۋى ءبىزدىڭ ەكىجاقتى ىنتىماقتاستىعىمىزدى ودان ارى نىعايتا تۇسەدى. بۇل ورتالىق ازيادا شەتەلدىك ينۆەستورلار ءۇشىن اعىلشىن قۇقىعى قولدانىلاتىن ءبىرىنشى تاجىريبە بولماق. ۇلى بريتانيا ا ح ق و قىزمەتكەرلەرى ءۇشىن ارنايى ترەنيگتەر ۇيىمداستىرىپ، تاجىريبەسىمەن بولىسۋگە دايىن»، - دەدى ەلشى.
مۇنان بولەك، ول قازاقستان مەن ۇلى بريتانيانىڭ الەمدىك ساياساتقا قاتىستى ەكىجاقى قارىم-قاتىناسى وتە جاقسى دەڭگەيدە ەكەندىگىن اتاپ ءوتتى.
«قازاقستاندى 2018-جىلدىڭ قاڭتارىندا ب ۇ ۇ قاۋىپسىزدىك كەڭەسىنە ءتوراعالىق ەتۋىمەن قۇتتىقتاعىم كەلەدى. ءبىز قازاقستانمەن سەرىكتەستىگىمىزدى جوعارى باعالايمىز. ۇلى بريتانيا ب ۇ ۇ قاۋىپسىزدىك كەڭەسىنىڭ تۇراقتى مۇشەسى جانە ءبىز ب ۇ ۇ الاڭىندا ۇزاق مەرزىمدى بەيبىتشىلىك پەن ىنتىماقتاستىقتى دامىتۋداعى تەرەڭ ىنتىماقتاستىعىمىزدى جالعاستىرۋعا نيەتتەمىز»، - دەدى دجون گيففورد.
ايتا كەتەرلىگى، ۇلى بريتانيا ەلشىسىنەن سەنىم گراموتاسىن قابىلداعان ەلباسى نۇرسۇلتان نازاربايەۆ: «ۇلى بريتانيا الەمدەگى ماڭىزدى ارىپتەسىمىزدىڭ ءبىرى ەكەنى ءسوزسىز. ەكى ەلدىڭ ىنتىماقتاستىعى ءوزارا قۇرمەت پەن سەنىمگە بەرىك نەگىزدەلگەن. بۇگىندە ۇلى بريتانيا قازاقستاننىڭ ءىرى ينۆەستورلارىنىڭ جانە ساۋدا ارىپتەسىنىڭ ءبىرى بولىپ سانالادى. مەنىڭ 2015-جىلعى لوندونعا ساپارىم وسى جەمىستى ىقپالداستىق پەن ەكى ەلدىڭ قارىم-قاتىناسىنا تىڭ سەرپىن بەردى. ءبىزدىڭ ساياسي ديالوگىمىز ەكى جاقتى فورماتتا تابىستى دامۋدا»، - دەپ اتاپ وتكەن ەدى.
اۆتور: مارلان جيەمباي
