ەلباسىنىڭ جاڭا جولداۋى جاستارعا جاڭا مۇمكىندىكتەر بەرەدى - ساراپشى
«جولداۋدا ەكپىن قويىلىپ وتىرعان ماڭىزدى باعىتتاردىڭ ءبىرى مەملەكەتتىك باسقارۋدىڭ تيىمدىلىگىن ارتتىرۋعا نەگىزدەلگەن. بۇل تيىمدىلىكتى ارتتىرۋ ءۇشىن جاڭا تەحنولوگيالاردى قولدانۋدىڭ مۇمكىندىگى زور. سونىمەن قاتار وسى تۇرعىدا بيزنەستى قولداۋعا ەرەكشە ءمان بەرىلىپ وتىر، ياعني بيزنەستىڭ الدىنداعى كەدەرگىلەردى بارىنشا جويىپ، ولارعا قوسىمشا مۇمكىندىك جاساۋ ەسكەرىلگەن. وسى ورايدا ءبىز بيزنەس پروتسەستەرىن جەڭىلدەتۋىمىز كەرەك»، - دەپ توقتالدى ج. سارابەكوۆ.
ونىڭ پايىمىنشا، مەملەكەتتىك اكىمشىلەندىرۋ ۇدەرىستەرىن جاڭا تەحنولوگيالار ارقىلى جەڭىلدەتۋىمىز قاجەت. سەبەبى بيزنەس كليماتىن جاقسارتپاساق، وندا شاعىن جانە ورتا بيزنەستىڭ دامۋى مۇمكىن ەمەس.
«جالپى العاندا، بۇگىن جاريالانعان جولداۋ وسىعان دەيىن مەملەكەتتىك دەڭگەيدە قابىلدانعان دامۋ باعدارلامالارىمەن ساباقتاس. ونەركاسىپتىك ريەۆوليۋتسيانىڭ مۇمكىندىكتەرىن ءوزىمىزدىڭ دامۋ ماقساتىمىزعا پايدالانۋ - جولداۋدىڭ باستى يدەياسى رەتىندە اتاپ كورسەتىلگەن. جاڭا تەحنولوگيالاردى ەنگىزۋ تەك قانا مەملەكەتتىك باسقارۋدا عانا ەمەس، سونىمەن قاتار يندۋستريالدى دامۋ، اۋىل شارۋاشىلىعى، كولىكتىك-لوگيستيكالىق كەشەن، ءبىلىم بەرۋ مەن دەنساۋلىق ساقتاۋ سالالارى ەسكەرىلىپ وتىر»، - دەيدى ول.
بۇدان بولەك، ج. سارابەكوۆ جولداۋ اياسىندا ۇكىمەتكە ۆيزا ماسەلەلەرىن جەڭىلدەتۋ تاپسىرىلعانىن ەسكە سالىپ ءوتتى.
«ينۆەستورلارمەن تىعىز بايلانىستا جۇمىس ىستەۋ ءۇشىن ۆيزالىق جەڭىلدىكتەر قاجەت ەكەنى انىق. سوندىقتان ينۆەستيتسيا تارتۋ ماڭىزدى ەكەنىن ەسكەرە وتىرىپ، وسى باعىتقا باسا نازار اۋدارۋىمىز كەرەك»، - دەپ توقتالدى ول.
مۇنىمەن قوسا، ساراپشى الەمدىك ەكونوميكاداعى كەيبىر كەرى پروتسەستەرگە قاراماستان، قازاقستان ءوزىنىڭ الەۋمەتتىك مىندەتتەمەلەرىن تولىق كولەمدە ورىنداپ وتىرعانىن اتادى.
«وسى ورايدا ەلىمىز الەۋمەتتىك مىندەتتەمەلەرگە كەپىلدىك بەرىپ، الەۋمەتتىك تولەمدەر كولەمىن ارتتىرۋعا قاۋقارلى. ماسەلەن، مۇعالىمدەردىڭ ەڭبەكاقىسىن ارتتىرۋ - سالاداعى جۇمىستاردى ىنتالاندىرىپ، ساپاعا دا اسەر ەتەتىنى ءسوزسىز. ءاربىر ادام ءوزىنىڭ جۇمىسىنان جاقسى اسەر الۋ كەرەك. سوندىقتان بۇل تۇرعىدا ۇستازداردىڭ مارتەبەسىن كوتەرۋگە ايرىقشا ءمان بەرىلىپ وتىرعانى انىق. ەندى جاستاردىڭ وسى سالاعا تارتىلۋىنا وڭ ىقپالى تيەدى دەگەن پىكىردەمىن»، - دەپ تۇيىندەدى ءسوزىن جۇمابەك سارابەكوۆ.
ايتا كەتەيىك، بۇگىن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قازاقستان حالقىنا «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋى جاريالاندى.
اۆتور: رۋسلان عابباسوۆ
