عالامدى يادرولىق قارۋدان ازات ەتۋدى قالايمىز - ق ر پرەزيدەنتى
بۇگىن اقوردادا ءبىرقاتار شەتەل ەلشىسىنەن سەنىم گراموتاسىن قابىلداعان قازاقستان پرەزيدەنتى نۇرسۇلتان نازاربايەۆ وسىلاي ايتتى، دەپ حابارلايدى قازاقپارات.
«قازاقستان بيىلعى قاڭتار ايىندا ب ۇ ۇ قاۋىپسىزدىك كەڭەسىنىڭ ءتوراعاسى رولىندەگى تاريحي قىزمەتىنە كىرىستى. وسى ماڭىزدى ورگاننىڭ كۇن تارتىبىندەگى بارلىق ماسەلەلەرگە ساي جۇمىس جۇرگىزىپ جاتقانىمىزدى بىلەسىزدەر. بيىل جىلدىڭ 18- قاڭتارىندا ب ۇ ۇ قاۋىپسىزدىك كەڭەسىنىڭ «جاپپاي قىرىپ-جوياتىن قارۋدى تاراتپاۋ: سەنىم شارالارى» اتتى بريفينگىنە قاتىسۋدى جوسپارلاپ وتىرمىن»، - دەدى ەلباسى.
مەملەكەت باسشىسى بۇل تاقىرىپ كەزدەيسوق تاڭدالماعاندىعىن دا باسا ايتتى.
«ءبىز تاراتپاۋ رەجىمىن دايەكتى تۇردە نىعايتۋ مەن كەڭەيتۋ ارقىلى عالامدى يادرولىق قارۋدان ازات ەتۋدى قالايتىندىعىمىزدى ايتىپ كەلەمىز»، - دەدى نۇرسۇلتان نازاربايەۆ.
ەلباسى ەكونوميكالىق باعىت قازاقستاننىڭ شەتەلدىك ارىپتەستەرىمەن ىنتىماقتاستىعىنىڭ باستى ارقاۋى ەكەندىگىن دە اتاپ ءوتتى.
«بۇل ءۇشىن ىسكەرلىك احۋالدى جاقسارتۋ جۇمىستارى جالعاسۋدا. بۇگىندە قازاقستان بيزنەس جۇرگىزۋ جەڭىلدىگى كورسەتكىشى بويىنشا 190 ەلدىڭ ىشىندە 36- ورىندا تۇر. ەڭبەك نارىعىنىڭ تيىمدىلىگى كورسەتكىشى بويىنشا ءبىز 35- ورىندامىز. 2017-جىلى ۆيزاسىز رەجىم قولدالىناتىن ەلدەر سانىن 62 گە جەتكىزدىك. ينۆەستورلارعا جەڭىلدىكتەر قاراستىرىلعان «ءبىر تەرەزە» قاعديداسى بويىنشا جۇمىس ىستەپ كەلەمىز. كاسىپكەرلىك سالاسىندا زاڭناما جەتىلدىرىلىپ، جاڭا سالىق كودەكسى قابىلداندى. 10 ارنايى ەكونوميكالىق ايماق پەن 20 عا جۋىق يندۋستريالىق ايماق جۇمىس ىستەدى»، - دەپ اتاپ ءوتتى ق ر پرەزيدەنتى.
اۆتور: مارلان جيەمباي
