ق ر پرەزيدەنتى كۋبا، شۆەتسيا، ءۇندىستان جانە ۇلى بريتانيا ەلشىلەرىنە تابىس تىلەدى
بۇگىن اقوردادا ءبىرقاتار شەتەل ەلشىسىنەن سەنىم گراموتاسىن قابىلداعان قازاقستان پرەزيدەنتى نۇرسۇلتان نازاربايەۆ وسىلاي دەدى، دەپ حابارلايدى قازاقپارات.
مەملەكەت باسشىسى سەنىم گراموتاسىن قابىلداۋ بارىسىندا قازاقستان تاۋەلسىزدىكتىڭ العاشقى كۇندەرىنەن باستاپ، كوپ ۆەكتورلى سىرتقى ساياسات جۇرگىزىپ كەلە جاتقانىن، بۇل حالىقارالىق قوعامداستىقتىڭ بارلىق مۇشەسىمەن ىنتىماقتاستىق باعىتىنداعى ديالوگتى ورناتۋعا باعىتتالعانىن باسا ايتتى.
«ۇلى بريتانيا الەمدەگى ماڭىزدى ارىپتەسىمىزدىڭ ءبىرى ەكەنى ءسوزسىز. ەكى ەلدىڭ ىنتىماقتاستىعى ءوزارا قۇرمەت پەن سەنىمگە بەرىك نەگىزدەلگەن. بۇگىندە ۇلى بريتانيا قازاقستاننىڭ ءىرى ينۆەستورلارىنىڭ جانە ساۋدا ارىپتەسىنىڭ ءبىرى بولىپ سانالادى. مەنىڭ 2015 -جىلعى لوندونعا ساپارىم وسى جەمىستى ىقپالداستىق پەن ەكى ەلدىڭ قارىم-قاتىناسىنا تىڭ سەرپىن بەردى. ءبىزدىڭ ساياسي ديالوگىمىز ەكى جاقتى فورماتتا تابىستى دامۋدا»، - دەدى قازاقستان پرەزيدەنتى.
ەلباسى شۆەتسيا ريكسداگىنىڭ (پارلامەنتى) سپيكەرى ۋربان اليننىڭ قازاقستانعا ساپارى وتكەن جىلدىڭ ماڭىزدى وقيعاسىنا اينالعانىن ايتتى. سونىمەن قاتار قازاقستان- شۆەتسيا ساۋدا- ەكونوميكالىق ىنتىماقتاستىعىن جانداندىرىپ، ساۋدا- ساتتىقتىڭ شاعىن كولەمىن ارتتىرۋىمىز قاجەتتىگىنە باسا نازار اۋداردى.
«ءبىز ءۇندىستاندى قازاقستاننىڭ ماڭىزدى سىرتقى ساياسي، ساۋدا سەرىكتەسى رەتىندە قارايمىز. ەلدەرىمىز حالىقارالىق ۇيىمدار اياسىندا ءوزارا بەلسەندى ءىس-قيمىل جاساپ كەلەدى. ءۇندىستاننىڭ شاڭحاي ىنتىماقتاستىق ۇيىمىنا تولىق مۇشەسى بولعانىنا قۋانىشتىمىز. ەلدەرىمىز بۇل ۇيىمنىڭ جۇمىسىنا تىڭ سەرپىن بەرىپ، مارتەبەسىن ارتتىرادى دەپ سەنەمىز»، - دەدى ەلباسى.
ق ر پرەزيدەنتى شاڭحاي ىنتىماقتاستىق ۇيىمى سامميتى اياسىندا ءۇندىستان پرەمەر-ءمينيسترى مارەندا مونيمەن كەزدەسىپ، ەكىجاقتى قارىم- قاتىناستىڭ قازىرگى ماسەلەلەرى جان- جاقتى تالقىلانعانىن اتاپ ءوتتى. سونداي-اق ەكى ەلدىڭ ۆەدومستۆولارىنا ساۋدا-ەكونوميكالىق ىنتىماقتاستىقتىڭ قارىمىن كۇشەيتۋ جونىندە ناقتى تاپسىرما بەرىلگەنىن ەسكە سالىپ ءوتتى.
«قازاقستان كۋبا مەملەكەتىمەن ەكىجاقتى ىنتىماقتاستىق اياسىن كەڭەيتۋگە مۇددەلى. سوڭعى جىلدارى قازاقستان- كۋبا قارىم- قاتىناستارى ايتارلىقتاي جاندانىپ كەلە جاتىر. مەن 2017 -جىلدىڭ ساۋىرىندە العاش رەت كۋباعا رەسمي ساپارمەن باردىم. كۋبا باسشىلىعىمەن وتكەن كەلىسسوزدەر بارىسىندا ءبىز ەكى ەلدىڭ اراسىنداعى ىنتىماقتاستىقتىڭ جاڭا پەرسپەكتيۆالارىن انىقتادىق. ەلدەرىمىزدىڭ ساۋدا ەكونوميكالىق ساياسي ىنتىماقتاستىعىن نىعايتۋ ءۇشىن ناقتى جۇمىستاردى جالعاستىرۋ قاجەت»، - دەدى نۇرسۇلتان نازاربايەۆ.
سونىمەن قاتار قازاقستان پرەزيدەنتى شەتەلدىك ديپلوماتتاردىڭ استاناداعى قىزمەتتەرىنىڭ قىزىقتى ءارى جەمىستى بولۋىنا تىلەكتەس ەكەنىن ءبىلدىردى.
«ميسسيالارىڭىز تابىستى بولىپ، مەملەكەتتەرىمىزدىڭ اراسىنداعى قارىم- قاتىناستارىمىزدى جان- جاقتى دامىتا تۇسەدى دەپ ويلايمىن. قازاقستاندا وتكەن كۇندەرىڭىز وزدەرىڭىز ءۇشىن دە جاقىندارىڭىز ءۇشىن دە جايلى بولسىن. ول جاعىنان ءبىزدىڭ مينيسترلىك تە، ۇكىمەت تە بارلىق جاعدايدى جاسايدى. سىزدەرگە تابىس تىلەيمىن»، - دەپ تۇيىندەدى ءسوزىن ەلباسى.
