دارىگەرلەر پويىز استىنا تۇسكەن ءسابيدىڭ ەكى اياعىن دەنەسىنە قايتا قوسىپ بەردى
اپات كەزىندە ونىڭ اناسى كوز جۇمدى. ال دارىگەرلەر ءسابيدىڭ ءبولىنىپ كەتكەن اياعىن دەر كەزىندە مۇزعا قويىپ، ساقتاپ قالعان.
بۇل تۋرالى اعىلشىن باسىلىمى Mirror حابارلايدى.
دارىگەر پراشانتتىڭ ايتۋىنشا، تابىلعان كەزدە بالا اناسىنىڭ قاسىندا قانسىراپ جاتقان. ءسابيدىڭ باعىنا وراي، تەمىر جول قىزمەتكەرلەرى مەن وقيعا كۋاگەرلەرى بالانىڭ ءبولىنىپ قالعان دەنە بولىكتەرىن مۇزعا قويىپ، دەر كەزىندە ساقتاپ قالعان.
العاشقى كومەك كورسەتىلگەن سوڭ-اق، موحاممەد كەرال شتاتىنداعى اۋرۋحاناعا جەتكىزىلگەن. ونداعى دارىگەرلەر تەز ارادا وتا جاساپ، ناعىز عاجايىپتىڭ بولاتىنىن دالەلدەدى.
بالانى قۇتقارعان دارىگەرلەر ونىڭ ەسىمىن دە بىلمەگەن، سوندىقتان اكەسىنە حابار بەرە الماپتى. ونى قۇتقارۋ ءۇشىن وزدىگىنەن شەشىم قابىلداعان اق حالاتتىلار اقىرىندا ەكى بىردەي اياعىن دەنەسىنە قايتا قوسىپ بەرگەن. سونىمەن ءۇندىستان تاريحىندا العاش رەت دەنەنىڭ اجىراپ قالعان بولىكتەرى ونىمەن قايتا بىتەسىپ كەتتى. سونداي-اق، موحاممەد مۇنداي وتانى باستان كەشىرگەن الەمدەگى ەڭ جاس ناۋقاس بولىپ تىركەلدى.
مىنە، ارادا سەگىز اي وتكەن سوڭ موحاممەد دارىگەرلەردىڭ الدىنا ءوز اياعىمەن كەلدى. بۇگىندە ول ءجۇرىپ قانا قويماي، جۇگىرە دە الادى. بالانىڭ، ءتىپتى، تەرى سەزگىشتىگى قالىپقا كەلگەن. دارىگەرلەردىڭ ايتۋىنشا، مۇنداي جاعداي سيرەك كەزدەسەدى.
