قازاقستاندا قىلمىستىق ىستەر سوتتالۋشىسىز قارالا باستادى

استانا. قازاقپارات - بيىلدان باستاپ قىلمىستىق ىستەر بويىنشا سوت وتىرىستارىن سوتتالۋشىنىڭ قاتىسۋىنسىز وتكىزۋگە بولادى، دەپ حابارلايدى قازاقپارات ءتىلشىسى.

ايتا كەتكەن ءجون، وتكەن جىلى ق ر قىلمىستىق ءىس جۇرگىزۋ كودەكسىنە بۇيرىق ءوندىرىسىنىڭ ءتارتىبى بويىنشا وزگەرىستەر ەنگىزىلگەن بولاتىن. جىلدىڭ باسىندا اتالعان وزگەرىستەر كۇشىنە ەندى. كودەكستىڭ 629-1 بابى، 4-تارماعىنا سايكەس، سۋديا سوتتالۋشىنى شاقىرماي-اق، قىلمىستىق ءىستى قاراي الادى.

قىزىلوردا قالاسىندا قىلمىستىق ءىس جۇرگىزۋدىڭ جاڭا ءتارتىبى بويىنشا سوت وتىرىسى ءوتتى. وندا 2-كۋرس ستۋدەنتى ك. ەسىمدى ازاماتتىڭ ءىسى قارالدى. سوت ماتەريالدارىنا سايكەس، ول وزىمەن بىرگە سۋىق قارۋ سانالاتىن «كاستەت» ۇستاپ جۇرگەن. ستۋدەنت تەمىرجول ۆوكزالىنداعى رەنگتگەن اپپاراتىنان وتكەن كەزدە كۇزەت قىزمەتى ونىڭ سومكەسىنەن كاستەتتى تاپتى. اتالعان قۇقىق بۇزۋشىلىق ءۇشىن ق ر قىلمىستىق كودەكسىنىڭ 10-بابى، 3-تارماعى بويىنشا جاۋاپكەرشىلىك قاراستىرىلعان.

«سوتتالۋشى الماتى قالاسىنداعى ۋنيۆەرسيتەتتە وقيدى. قازىرگى كەزدە ول ەمتيحانداردى تاپسىرىپ ءجۇر. وسىعان بايلانىستى قىلمىستىق ءىستى پروتسەسسۋالدى بۇيرىق ءتارتىبى بويىنشا وتكىزۋ تۋرالى ءوتىنىشحات بەرىلدى. سوت ك. ەسىمدى ازاماتتى كىنالى دەپ تانىپ، 25 ايلىق ەسەپتىك كورسەتكىش كولەمىندە - 56725 تەڭگەنىڭ ايىپپۇلىن تولەۋگە مىندەتتەدى»، - دەلىنگەن سوتتىڭ رەسمي حابارلاماسىندا.

ايتا كەتەيىك، بۇعان دەيىن ەلىمىزدە تەك ازاماتتىق ىستەر عانا سوتتالۋشىسىز قارالىپ كەلدى.