قازاقستاندا مەملەكەتتىك قىزمەتكەرلەر جالاقىسىن تولەۋدىڭ پيلوتتىق جوباسى ىسكە اسىرىلادى - جولداۋ

استانا. قازاقپارات - ەلباسى ن. نازاربايەۆتىڭ بۇگىن جاريالانعان قازاقستان حالقىنا كەزەكتى «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا ءتيىمدى مەملەكەتتىك باسقارۋعا بايلانىستى ءبىرقاتار تاپسىرما بەرىلدى، دەپ حابارلايدى «قازاقپارات» ح ا ا.

«مەملەكەتتىك اكىمشىلەندىرۋ كەزىندە كاسىپكەرلەر مەن تۇرعىنداردىڭ شىعىندارىن قىسقارتۋعا بايلانىستى جۇمىستاردى جالعاستىرۋ قاجەت. وسىعان وراي بيزنەستى رەتتەۋگە قاتىسۋدى ءارى قاراي ازايتۋعا باعىتتالعان زاڭ قابىلداۋدى جىلدامداتۋ كەرەك»، - دەپ اتاپ وتىلگەن جولداۋدا.

بۇل رەتتە «ءبىر تەرەزە» قاعيداتى بويىنشا بيزنەسكە مەملەكەتتىك قولداۋ كورسەتۋ ۇدەرىستەرىن سيفرلاندىرۋدى قامتاماسىز ەتۋ قاجەتتىگىنە نازار اۋدارىلادى.

«مەملەكەتتىك ورگانداردىڭ اقپاراتتىق جۇيەلەرىنىڭ ينتەگراتسياسى «ءبىر ءوتىنىش» قاعيداتى بويىنشا جەكەلەگەن مەملەكەتتىك قىزمەت كورسەتۋدەن كەشەندى قىزمەت كورسەتۋگە كوشۋگە مۇمكىندىك بەرەدى. سونىمەن قاتار تابيعي مونوپوليا سۋبەكتىلەرى كورسەتەتىن قىزمەتتەرىنىڭ ساپاسىن ارتتىرۋ جونىندەگى جۇمىستى جالعاستىرۋ كەرەك. ولار ءۇشىن جانە ەنەرگيا وندىرۋشىلەر ءۇشىن ينۆەستيتسيالىق باعدارلامالارىن ەسكەرىپ، نەگىزدەلگەن تاريفتەردى بەلگىلەۋ ماڭىزدى. مەملەكەتتىك ورگاندارعا باعىنىشتى ۇيىمداردىڭ سانىن قىسقارتۋ ەسەبىنەن جەكەشەلەندىرۋ جوسپارىن كەڭەيتە وتىرىپ، ونى ىسكە اسىرۋدى جەدەلدەتۋ قاجەت. اكىمشىلىك شىعىنداردى ازايتۋ ءۇشىن ۆەدومستۆوعا باعىنىشتى ناقتى قاجەتتى ۇيىمداردى مۇمكىندىگىنشە بىرىكتىرۋ كەرەك، دەلىنگەن ەلباسى جولداۋىندا.

بوساعان قاراجاتتى مەملەكەتتىك قىزمەتشىلەردىڭ فاكتورلىق- بالدىق شكالاعا نەگىزدەلگەن جاڭا ەڭبەكاقى جۇيەسىن ەنگىزۋگە باعىتتاۋ قاجەت.

بۇل ورتالىقتاعى جانە وڭىرلەردەگى مەملەكەتتىك ديسپروپورتسياسىن قىسقارتادى، سونداي-اق جۇمىستىڭ سيپاتى مەن تيىمدىلىگى ەسكەرىلەتىن بولادى.

«ۇكىمەتكە مەملەكەتتىك قىزمەت ىستەرى اگەنتتىگىمەن بىرلەسىپ، 2018 -جىلى ورتالىق جانە جەرگىلىكتى مەملەكەتتىك ورگانداردا وسى جۇيەنى ەنگىزۋدىڭ پيلوتتىق جوبالارىن ىسكە اسىرۋدى تاپسىرامىن. جالپى العاندا، وڭىرلىك ساياسات وڭىرلەردىڭ شىعىندارىن تەڭەستىرۋدەن جەكە تابىستارىنىڭ ءوسىمىن ىنتالاندىرۋعا باعىتتالۋعا ءتيىس. 2018 -جىلدىڭ 1 -قاڭتارىنان باستاپ 2 مىڭنان استام ادام تۇراتىن اۋداندىق ماڭىزى بار قالالار، اۋىلدار مەن اۋىلدىق وكرۋگتەردە جەرگىلىكتى ءوزىن- ءوزى باسقارۋدىڭ دەربەس بيۋدجەتى مەن كوممۋنالدىق مەنشىگىن ەنگىزۋ زاڭ جۇزىندە بەلگىلەنگەن. 2020 -جىلدان باستاپ بۇل نورمالار بارلىق ەلدى مەكەندەردە كۇشىنە ەنەدى. سالىقتىق جانە سالىقتان تىس باسقا دا تۇسىمدەردىڭ 7 ءتۇرى، سونداي- اق شىعىنداردىڭ 19 باعىتى اۋىل بيۋدجەتىنە بەرىلگەندىگىن ايتتى. بۇل جەرگىلىكتى ماڭىزى بار ماسەلەلەردى شەشۋ ءۇشىن حالىقتى تارتۋعا مۇمكىندىك بەرەدى» دەپ اتاپ وتەدى ەلباسى.

سونىمەن قاتار مەملەكەتتىك ورگاندار ناقتى ۋاقىت جانە جەدەل جاۋاپ بەرۋ رەجىمىندە ازاماتتاردىڭ ەسكەرتپەلەرى مەن ۇسىنىستارىن ەسەپكە الۋ ءۇشىن زاماناۋي تسيفرلىق تەحنولوگيالاردى قولدانۋعا ءتيىس.

مەملەكەت پەن كومپانيالار جاڭا تەحنولوگيالاردى ەنگىزە وتىرىپ، ءوز اقپاراتتىق جۇيەلەرى مەن قۇرىلعىلارىنىڭ بەرىك قورعالۋىن قامتاماسىز ەتۋى كەرەك.

«بۇگىندە كيبەرقاۋىپسىزدىك ۇعىمى تەك اقپاراتتى عانا ەمەس، سونىمەن قاتار وندىرىستىك جانە ينفراقۇرىلىمدىق نىسانداردى باسقارۋ تەتىگىن قورعاۋ دەگەندى دە بىلدىرەدى.

وسى جانە وزگە دە شارالار قازاقستاننىڭ ۇلتتىق قاۋىپسىزدىك ستراتەگياسىندا كورىنىس تابۋعا ءتيىس»، - دەلىنگەن جولداۋدا.