نەسيەسىن قايتارا الماي جۇرگەندەر نەنى ءبىلۋى كەرەك

استانا. قازاقپارات - ق ر ۇلتتىق بانكى كوللەكتورلىق قىزمەتتىڭ بورىشكەرلەرمەن جۇمىس ىستەۋ بارىسىنداعى نەگىزگى قاعيدالارىن ەسكە سالدى، دەپ حابارلايدى قازاقپارات ۇلتتىق بانكتىڭ باسپا ءسوز قىزمەتىنە سىلتەمە جاساپ.

كوللەكتورلار بورىشكەرلەرگە تاڭعى 08.00-دەن 21.00-گە دەيىن كۇنىنە ءۇش رەت قانا حابارلاسا الادى. ولارعا اپتا ىشىندە 3 كەزدەسۋ وتكىزۋگە عانا رۇقسات ەتىلگەن جانە تاڭعى ساعات 08.00 مەن 21.00 ارالىعىندا ءبىر رەتتەن ارتىق كەزدەسۋگە تىيىم سالىنعان. سونداي-اق، كەزدەسۋدىڭ ۋاقىتىن بورىشكەر بەلگىلەيدى. جانە مۇنىڭ بارلىعى جۇمىس كۇندەرى عانا جۇرگىزىلۋى ءتيىس، مەرەكە جانە دەمالىس كۇندەرى كەز كەلگەن بايلانىسقا رۇقسات ەتىلمەيدى.

كوللەكتورلىق اگەنتتىكتەرگە بورىشكەردى ءوز مىندەتتەرىن ورىنداۋعا ماجبۇرلەۋدىڭ كەز كەلگەن ءتاسىلىن قولدانۋعا زاڭ جۇزىندە تىيىم سالىنادى. اتاپ ايتقاندا، جالعان اقپارات تاراتۋعا، ومىرىنە ءقاۋىپ توندىرۋگە، بوپسالاۋعا، الاياقتىق جاساۋعا، قارىزىن وتەۋ ءۇشىن بورىشكەردەن اقشا نەمەسە مۇلىك الۋعا، نەسيە بەرۋشىنىڭ قۇپياسىن اشۋعا بولمايدى.

كوللەكتورلىق اگەنتتىكتەردە ىسكەرلىك ابىروي-بەدەلى تازا، پسيحوديسپانسەر، ناركوديسپانسەر جانە تۋبديسپانسەردە ەسەپكە تۇرماعان ماماندار جۇمىس ىستەۋى كەرەك.

سونىمەن بىرگە، 2018 -جىلدىڭ 1 -قاڭتارىنداعى جاعداي بويىنشا، ۇلتتىق بانكتىڭ ەسەپتىك تىركەۋىنە 60 كوللەكتورلىق اگەنتتىك وتكەن، ولاردىڭ باسىم بولىگى الماتى قالاسىندا (34) تىركەلگەن.