ءماجىلىس دەپۋتاتى ءوندىرىس ورىندارىن ارالادى - اقمولا وبلىسى

كوكشەتاۋ. قازاقپارات - قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ماۋلەن اشىمبايەۆ جۇمىس ساپارىمەن كوكشەتاۋ قالاسىندا بولدى، دەپ حابارلايدى «قازاقپارات» ح ا ا ءتىلشىسى.

ساپار بارىسىندا حالىق قالاۋلىسى الدىمەن وبلىستاعى ىرگەلى كاسىپورىن سانالاتىن «تىنىس» اكسيونەرلىك قوعامىندا بولىپ، ءوندىرىس سەحتارىن ارالاپ كوردى. بۇگىنگى تاڭدا وسى زاۋىتتا شىعارىلاتىن اۆياتسيا، تەمىر جول، مۇناي سالالارىنا قاجەتتى قوسالقى بولشەكتەر مەن قارۋلى كۇشتەر قۇرىلىمدارىنا ارنالعان برونەجيلەتتەر تاپسىرىس بەرۋشىلەر تاراپىنان جاقسى باعا الىپ، سۇرانىسقا يە بولۋدا.

زاۋىت اقمولا وبلىسىندا ماشينا جاساۋ ءىسىنىڭ كوش باسىندا تۇر. قازاقستان رەسپۋبليكاسى ۇكىمەتىنىڭ ۇدەمەلى يندۋستريالىق- يننوۆاتسيالىق دامۋ باعدارلاماسىنىڭ ونەركاسىپتى ءارتاراپتاندىرۋ باعىتىن جۇزەگە اسىرۋ ماقساتىندا جۇمىس ىستەۋدە.

زاۋىتتىڭ باس ديرەكتور قايرات قالمانبايەۆتىڭ سوزىنە قاراعاندا، بۇگىنگى تاڭدا «تىنىس» اكسيونەرلىك قوعامى كوپ سالالى كاسىپورىن قاتارىندا. سوڭعى جىلدارى مۇنايگاز جانە تەمىر جول سەكتورىنداعى قازاقستان رەسپۋبليكاسى ۇلتتىق كومپانيالارىنىڭ قاجەتتىلىگى ءۇشىن ونىمدەردىڭ ۇلكەن ءتىزىمى يگەرىلدى. اۆياتسيالىق ءونىمنىڭ نەگىزگى تۇتىنۋشىلارى - رەسەي مەن بەلارۋستىڭ اۆياجاساۋ جانە اۆياجوندەۋ كاسىپورىندارى. كاسىپورىننىڭ ءونىمىن ساتۋ ساياساتى ىشكى جانە سىرتقى نارىقتارعا باعىتتالعان. وسى كۇنى «قازاقستان تەمىر جولى»، «قازمۇنايگاز»، «قازاتوم ونەركاسىپ»، «قازاق تەلەكوم»، «قازترانسويل»، «قازترانس گاز»، «KEGOK» اكسيونەرلىك قوعامدارى سياقتى ءىرى كومپانيالارعا ونىمدەرىن جەتكىزەدى.

ءماجىلىس دەپۋتاتى زاۋىتتىڭ قۇراستىرۋ تسەحىن ارالاپ كورىپ، شىعارىلىپ جاتقان ءونىم تۇرلەرىمەن تانىستى.

«سوڭعى كەزدە كاسىپورىن باسشىلىعى ءونىم وندىرۋدە وتاندىق ۇلەستىڭ مول بولۋىنا ەرەكشە نازار اۋدارىپ كەلەدى. دەگەنمەن، ءالى دە وتاندىق ۇلەستى ارتىرۋ جانە دايىن ءونىمدى ساتۋ شەكاراسىن كەڭەيتۋ باعىتتىندا ءالى دە اۋقىمدى جۇمىس ىستەۋ كەرەك. ءبىز ءوز تاراپىمىزدان كومەكتەسۋگە دايىنبىز»، - دەدى ءماجىلىس دەپۋتاتى ماۋلەن اشىمبايەۆ.

سونىمەن قاتار، ءماجىلىس دەپۋتاتى «55/10» اسكەري ءبولىم مەن «كوكشەتاۋ ءسۇت زاۋىتى» ج ش س جۇمىسىمەن تانىستى.

 ال، «نۇر وتان» پارتياسى وبلىستىق فيليالىندا ازاماتتاردى جەكە ماسەلەلەرى بويىنشا قابىلداعان حالىق قالاۋلىسىنا كەلگەن كوكشەتاۋلىق تۇرعىندار مىندەتتى اسكەري قىزمەتتى وتەۋ، زەينەتاقى تولەمدەرىن ءوسىرۋ سياقتى ماسەلە كوتەردى.

اۆتور: اسلان وسپانوۆ