قاڭتاردا ورىستار نەگە كوپ ولەدى؟

  استانا. قازاقپارات - قاڭتار ايى شىن مانىندە رەسەيدە تۇراتىن ورىس ۇلتىنىڭ وكىلدەرىنە قيىن تيەدى ەكەن. نەگە دەيسىز عوي؟

باسقالارعا قاراعاندا ورىس ۇلتىنىڭ وكىلدەرى قاڭتار ايىندا كوبىرەك كوز جۇمادى. وسى پروبلەمانى كەڭىرەك زەرتتەپ جۇرگەن مامان الەكساندر نەمتسوۆ قاڭتار ايىندا ورتاشا ەسەپپەن 18 مىڭ رەسەيلىك كوز جۇماتىنىن ايتتى. مۇنىڭ سەبەبىن ساراپشى ورىس ۇلتىنىڭ ىشىمدىككە كوبىرەك اۋەستىگىنەن كورىپ وتىر.

- ارينە، مەيرامدا كوڭىل كوتەرگەن جاقسى. ءبىراق ءوز شامامىزدى بىلمەي كەتەمىز عوي. ىشكىلىكتىڭ سالدارى اۋىر زارداپقا اپارىپ سوعاتىنىن دا ۇمىتىپ كەتە بەرەمىز. اقىرىندا ماسكۇنەمگە اينالامىز. اراققۇمارلىعىمىزدى مويىنداماي، اپتالاپ جاتىپ ىشەمىز. سونىڭ سالدارىنان ءارتۇرلى وقيعالارعا ۇرىنىپ جاتامىز. ەڭ قيىنى، وسى ايدا ىشكىلىكتىڭ سالدارىنان ادام ءولىمى كوبەيىپ وتىر، - دەيدى ساراپشى الەكساندر نەمتسوۆ.

رسەيلىك ماماننىڭ پىكىرىنىڭ ءجونى بار سياقتى. ول سوڭعى ون جىلدان بەرى قاڭتار ايىندا بولاتىن ءولىم- ءجىتىمدى جەتە زەرتتەپ كەلگەن. قۋاناتىنداي كورسەتكىش جوق. جىل سايىن بۇل جاعىمسىز كورسەتكىشتەر 10 پايىزعا ارتىپ، كوبەيىپ كەلەدى.

- اسىرەسە بۇل جاعداي رەسەيدىڭ ماسكەۋ، ارحانگەلسك، ەكاتەرينبۋرگ، چيتا جانە قىرىم ولكەسىندە كوبىرەك بايقالادى. ىشكىلىكتىڭ سالدارىنان سۋىق ايازعا ۇرىنىپ، ءۇسىپ قالاتىندار كوپ. اراق ىشكەسىن توڭعانىن بىلمەي، دالادا جۇرە بەرەتىندەر كوپ. ارتىنان تىماۋ ءتيىپ جاتقاندار دا جەتەرلىك. سوندىقتان جاڭا جىلعى مەيرامنان باستالاتىن قاڭتارداعى مەرەكە ءبىزدىڭ ۇلتقا وڭاي تيمەي تۇر، - دەيدى الەكساندر نەمتسوۆ.

 2003 -جىلى رەسەي ۇكىمەتى جاڭا جىل مەن روجدەستۆو مەرەكەسىنىڭ اراسىن ءۇزىپ، ەكى- ءۇش كۇن جۇمىس كۇنى ەتكەنى بەلگىلى. وسى ورايدا ساراپشى قاڭتار ايىندا ادام ءولىمىن ازايتۋ ءۇشىن رەسەيدە وسى ءۇردىستى رەسمي تۇردە قايتادان ەنگىزۋ كەرەك دەپ ەسەپتەيدى.

 

بەرىك بەيسەن ۇلى

«ايقىن»