وليمپيادادا قازاقستان تۋىن شورتترەكشى ابزال اجىعاليەۆ الىپ شىعادى
ق ر مادەنيەت جانە سپورت مينيسترلىگى سپورت ىستەرى جانە دەنە تاربيەسى كوميتەتى ءتوراعاسىنىڭ ورىنباسارى سەرىك جاراسبايەۆتىڭ ءمالىم ەتكەنىندەي، شورت-ترەكتەن قازاقستان ۇلتتىق قۇراماسى الەم كۋبوگى كەزەڭدەرىنە قاتىسىپ، جاقسى ناتيجە كورسەتتى. ءسويتىپ، شورتترەكشىلەر ءوز تاريحىندا العاش رەت وليمپيادانىڭ ون جولداماسىنا يە بولدى. سوندىقتان تۋ كوتەرۋشى رەتىندە شورت-ترەكشى ابزال اجىعاليەۆتىڭ تاڭداپ الىنۋى تەگىن ەمەس.
ايتا كەتەيىك، ابزال اجىعاليەۆ باتىس قازاقستان وبلىسىنىڭ سىرىم اۋدانىندا 1992-جىلى دۇنيەگە كەلگەن. ورالدا 2001-جىلى جابىق مۇز ايدىنى سارايى اشىلعاننان كەيىن شورت-ترەكتەن قازاقستاننىڭ ەڭبەك سىڭىرگەن جاتتىقتىرۋشىسى ءمادىعالي قارسىبەكوۆ دايىنداعان شاكىرتتەرىنىڭ ءبىرى.
ول سوچي وليمپياداسىندا نەگىزىن باتىس قازاقستاندىق شورتترەكشىلەر قۇراعان ق ر ۇلتتىق قۇراماسى ساپىندا 5 مىڭ مەترلىك ەستافەتادا بەسىنشى ورىنعا تابان تىرەدى. ال 2016-جىلى قاراشادا ا ق ش- تىڭ سولت-لەيك-سيتي قالاسىندا شورت-ترەكتەن الەم كۋبوگى كەزەڭىندە 500 مەتر قاشىقتىقتا ايدى اسپانعا شىعارىپ، جەڭىمپاز اتاندى. ول مۇنداي تابىسقا قازاقستاندىقتار اراسىنان تۇڭعىش رەت قول جەتكىزدى. ودان كەيىن وتكەن جىلى الماتى قالاسىندا دۇنيەجۇزىلىك قىسقى ۋنيۆەرسيادادا جانە مينسكىدە الەم كۋبوگى كەزەڭىندە ءدال سول قاشىقتىقتا كۇمىس جۇلدەگە يە بولدى.
ا. اجىعاليەۆ قازىرگى تاڭدا كوماندالاستارىمەن بىرگە گوللانديادا جاتتىعۋدا.
قازاقستان ۇلتتىق قۇراماسىنىڭ باس باپكەرى م. قارسىبەكوۆتىڭ سوزىنە قاراعاندا، ابزال وليمپيادادا ءوزىنىڭ وڭ جامباسىنا كەلەتىن 500 مەتر قاشىقتىقتا سىنعا تۇسەدى.
اۆتور: ەلجان ەرالى
