اقپارات مينيسترلىگى: ۇيالى بايلانىس وپەراتورلارىنىڭ ءبىرقاتار وزەكتى ماسەلەلەرى شەشىلەدى

استانا. قازاقپارات - بايلانىس قىزمەتىن كورسەتۋ ەرەجەسىنە جاڭا وزگەرتۋلەر ەنگىزىلۋىنە بايلانىستى ءبىرقاتار وزەكتى ماسەلەلەر شەشىلەتىن بولدى.

بۇل تۋرالى ق ر اقپارات جانە كوممۋنيكاتسيالار ءمينيسترى داۋرەن ابايەۆ فەيسبۋكتەگى پاراقشاسىندا حابارلادى.

«ءبىزدىڭ مينيسترلىك بايلانىس قىزمەتىن كورسەتۋ ەرەجەسىنە جاڭا وزگەرتۋلەر ەنگىزۋدە. بۇل وزگەرتۋلەر ۇيالى بايلانىس ابونەنتتەرى كوپتەن بەرى ايتىپ جۇرگەن ءبىرقاتار پروبلەمانى شەشۋگە باعىتتالىپ وتىر» دەلىنگەن حابارلامادا.

قانداي كەلەڭسىزدىكتەر جويىلاتىنىنا تومەندە ءبىرقاتار مىسالدار كەلتىرىلگەن.

اقپارات ءمينيسترىنىڭ مالىمدەۋىنشە، جاڭا ەرەجە بايلانىس وپەراتورلارىنا جەكە شوتتا قاراجات بولماعان جاعدايدا قىزمەت كورسەتۋگە توسقاۋىل قويىپ وتىر. بۇل - نەگىزىنەن روۋمينگ قىزمەتىنە قاتىستى. وسىلايشا، ءبىز ابونەنتتىك نومەردىڭ «مينۋس» بولۋىنىڭ، ياعني قارىز بولىپ قالۋىنىڭ الدىن الامىز.

سونداي-اق، بۇدان بىلاي اۋىستىرىلعان نومەرگە قوڭىراۋ شالۋ كەزىندە «beep» قوسۋ سيگنالىن ەرىكتەن تىس ورناتۋ پراكتيكاسى جويىلادى. ەندى شاقىرۋ سيگنالىنىڭ الدىندا قوسىمشا اكۋستيكالىق سيگنالدار مەن پاۋزالاردى ورناتۋ ابونەنتتىڭ وتىنىشىمەن عانا ىسكە اسادى.

سونىمەن قاتار، ابونەنتكە ussd كوماندا نەمەسە س م س جىبەرۋدى ەنگىزۋ ارقىلى قوسىمشا بايلانىس قىزمەتتەرىن تاڭۋ پروبلەماسى دا شەشىلدى. ەندى كلاۆيشتى قاتەلەسىپ باسۋ، كەزدەيسوق حابارلاما جىبەرۋ نەمەسە باسقا دا بايقاۋسىزدا بولعان ارەكەتتەر سالدارىنان قاجەتسىز قىزمەتتەرگە قوسىلىپ كەتپەيسىز.

جاقىن ۋاقىتتا قۇجاتتىڭ تولىق ءماتىنى ب ا ق- تا جاريالانادى، وسىدان كەيىن 10 كۇننەن سوڭ ول كۇشىنە ەنەدى.