الەمگە تانىمال التى مارافون

استانا. قازاقپارات - ق ر جەڭىل اتلەتيكا فەدەراتسياسى الەمگە ايگىلى التى مارافون جارىسىن ۇسىندى، دەپ حابارلايدى قازاقپارات.

ولار:

بوستون مارافونى (BAA Boston Marathon) - جىل سايىن وتكىزىلەتىن ءداستۇرلى جارىس (ا ق ش، ماسساچۋسەتس شتاتى). ول ءساۋىر ايىنىڭ ءۇشىنشى دۇيسەنبىسى كۇنى ۇيىمداستىرىلادى.

بوستون مارافونى - ەڭ العاش رەت كاسىپكەر حەربەرت حولتوننىڭ قولداۋىمەن 1897-جىلى وتكىزىلگەن.

نەگىزىنەن بۇعان 27 مىڭ ادامعا دەيىن قاتىسۋعا دەيىن رۇقسات ەتىلگەن. الايدا كەيبىر جىلدارى 36-38 مىڭعا دەيىن جەتكەن. بۇل مارافوندى 500 مىڭنان استام كورەرمەن تاماشالايدى.

2013-جىلدىڭ 15 ساۋىرىندە مارافوننىڭ مارەگە جەتەر تۇسىندا بولعان ەكى جارىلىستان 3 ادام قازا تاۋىپ، 200 دەن استام ادام جاراقات الدى. بۇل جارىلىستى اعايىندى تامەرلان مەن دجوحار تسارنايەۆتاردىڭ ۇيىمداستىرعانى انىقتالعان ەدى. تامەرلان پوليتسيامەن اتىس كەزىندە قازا تاپسا، دجوحار سوت ۇكىمىمەن ءولىم جازاسىنا كەسىلدى.

لوندون مارافونى (Virgin London Marathon) جىل سايىن وتكىزىلەدى. نەگىزىنەن ساۋىردە. ەڭ العاش 1981-جىلى ۇيىمداستىرىلعان. 2014-جىلى مارافونعا 36550 ادام قاتىستى. ونىڭ كورەرمەندەر سانى 750 مىڭنان اسىپ جىعىلادى.

ستارتقا كاسىپقوي جانە اۋەسقوي جۇگىرۋشىلەردىڭ بارلىعى قاتىسا الادى.

بەرلين مارافونى (BMW Berlin-Marathon) - قىركۇيەك ايىنىڭ سوڭعى جەكسەنبىسىندە. العاش رەت 1974-جىلى 13- قازاندا ۇيىمداستىرىلعان.

1990-جىلعا دەيىن تەك باتىس بەرليندە وتكىزىلىپ كەلدى، ال بەرلين قابىرعاسى قۇلاعان سوڭ، مارافونشىلار براندەنبۋرگ قاقپاسى ارقىلى دا جۇگىرەتىن بولدى.

جالپى 40 مىڭ ادام قاتىسۋعا مۇمكىندىك بار. 2008-جىلى مارەگە 35913 ادام جەتتى. كورەرمەندەر سانى - 1,5 ميلليون شاماسىندا.

چيكاگو مارافونى (Bank of America Chicago Marathon) - ا ق ش- تىڭ يللينويس شتاتىندا قازان ايىندا وتكىزىلەدى. كۇزگى مارافونداردىڭ ىشىندەگى ەڭ تانىمالى.

2011-جىلى گۇلجانات جاناتبەكتى جاتتىقتىرىپ جۇرگەن رەسەيلىك ليليا شوبۋحوۆا ءۇشىنشى رەت وسى مارافوندا سۋىرىلىپ شىعىپ، رەكورد ورناتقان بولاتىن. ءبىراق كەيىننەن دوپينگ داۋىنا بايلانىستى بارلىق ناتيجەلەرى جويىلدى.

45 مىڭ قاتىسۋشىعا دەيىن رۇقسات ەتىلگەن. كورەرمەن سانى بۇگىنگى تاڭدا 1,7 ميلليونعا دەيىن جەتىپ وتىر.

نيۋ-يورك مارافونى (ING New York City Marathon) جىل سايىن قاراشا ايىنىڭ ءبىرىنشى جەكسەنبىسىندە وتكىزىلەدى.

بۇل جارىس 1970-جىلدان باستاۋ الادى. العاشىندا 127 ادام قاتىسىپتى. ول كەزدە قالاداعى ورتالىق ساياباقتىڭ اينالاسىندا ۇيىمداستىرىلعان. ارادا 5 جىل وتكەندە وسى مارافوننىڭ نەگىزىن سالعان فرەد لەبو جۇگىرۋ تاس جولىنا وزگەرىس ەنگىزىپ، ەندى نيۋ-يوركتىڭ بەس اۋدانىن قامتيتىن بولدى. قازىرگى كەزدە اتالعان مارافون قاناتىن جايىپ، الەمدەگى ەڭ تانىمالدارىنىڭ قاتارىنا ەنگەن.

جىل سايىن نيۋ-يورك مارافونىنا قاتىسۋعا 40 مىڭ ادام كەلەدى. 2011-جىلى 47340 ادام جارىستى. ال 2 ميلليوننان استام كورەرمەن ولاردى قولداۋ ءۇشىن كوشەگە شىعادى.

توكيو مارافونى (Tokyo Marathon) - ازيا قۇرلىعىنداعى ەڭ ءىرىسى. تاريحى 1981-جىلدان باستاۋ الادى. 2013-جىلى بۇعان 35,5 مىڭ ادام اتسالىستى. ال قاتىسۋشىلار قالانىڭ بارلىق كورىكتى جەرلەرىن جۇگىرىپ وتەدى.

ەستەرىڭىزگە سالا كەتەيىك، وتكەن جىلى 27- تامىزدا استانادا العاش رەت IAAF- تىڭ سەرتيفيكاتىن العان حالىقارالىق ش ى ۇ مارافونى ءوتتى. وعان 5000 نان استام ادام قاتىستى. سونداي-اق، سوڭعى كەزدەرى جالپى حالىقتىق مارافون ۇيىمداستىرۋ قازاقستاندا دا ءداستۇرلى ۇردىسكە اينالىپ كەلەدى. الماتى، استانا قالالارىنان بولەك، وبلىس ورتالىقتارىندا دا ءار ءتۇرلى دەڭگەيدە ۇيىمداستىرىلا باستادى.

اۆتور: كۇنسۇلتان وتارباي