اقسۋاتقا اققۋ كەلدى - كەسكىن

استانا. قازاقپارات - بىلتىر وسى ۋاقىت شاماسىندا تارباعاتاي اۋدانىنىڭ اقسۋات اۋىلىنا دالا ەركەسى - ەلىكتىڭ كىرىپ كەتىپ، ادامداردان پانا ىزدەگەنىن حابارلاعان ەدىك.

ەندى مىنە بيىل اقسۋاتقا قۇس ەركەسى - اققۋدىڭ كەلگەنىن سۇيىنشىلەپ وتىرمىز، دەپ جازادى «ەگەمەن قازاقستان» گازەتىنىڭ ءتىلشىسى.

قوس اققۋدىڭ اقسۋات ماڭىنداعى شاعىن وزەندەردىڭ بىرىنە قونعانى جونىندەگى اقپار پەن ۆيدەونى ەڭ اۋەلى ايتىسكەر اقىن وڭعار قابدەنوۆتىڭ فەيسبۋك الەۋمەتتىك جەلىسىندەگى پاراقشاسىنان وقىپ، كورىپ، وزىنە حابارلاسقانبىز. سويتسەك بۇل ۆيدەونى تۇسىرگەن اقسۋات اۋىلىنىڭ جامبىل كوشەسىنىڭ تۇرعىنى ۇلپان ارعىنتاي قىزى ەكەن.

بىردەن ۇلپاننىڭ وزىنە تەلەفون شالدىق. «قوس اققۋدىڭ ءۇيىمىزدىڭ جانىنداعى ارىققا قونعانىن ەڭ ءبىرىنشى مەنىڭ باۋىرىم كورىپتى. ماعان كەلىپ «ۆيدەوعا تۇسىرەمىن» دەپ تەلەفونىمدى سۇرادى. «نە ءۇشىن؟» دەپ ەم، «باقشانىڭ جانىنداعى سۋدا اققۋ ءجۇر» دەدى. باۋىرىممەن بىرگە بارسام راسىندا دا ەكى اققۋ ءجۇزىپ ءجۇر ەكەن. بارىپ نان بەرمەكشى بولىپ ەك، ۇركىپ ءارى قاراي ۇشىپ، ماڭىنا جۋىتپادى. ەرتەڭىندە جۇمىستان تۇسكى اسقا كەلسەم، ۇشىپ كەتىپتى»، - دەيدى ۇلپان.

قۇس تورەسىنىڭ قاڭتارداعى كەلىسىن اۋدان جۇرتشىلىعىنىڭ ءبىرقاتارى جاقسىلىققا بالاپ جاتسا، ەندى ءبىرى «كولگە قوناتىن اققۋدىڭ شاعىن وزەندە جۇرگەنى نەسى؟» دەپ تۇسىنبەي الەك. تارباعاتاي اۋدانىنداعى ەكولوگيا جانە تابيعاتتى قورعاۋ قورىنىڭ ءتوراعاسى ەرجان قۇتتىبايەۆ قوس اققۋدىڭ ءبىرى اۋىرىپ قونۋى مۇمكىن ەكەندىگىن ايتادى.