بي-بي-سي ارناسىندا قازاقتار تۇسكەن فيلم كورسەتىلىپ جاتىر
دەپ حابارلايدى قازاقپارات.
1 - قاڭتاردان باستاپ شەتەلدىك ارنادا اعىلشىن- امەريكالىق BBC جانە AMC ارنالارى بىرىگىپ تۇسىرگەن سەريال كورسەتىلىپ جاتىر.
كينو بريتان جۋرناليسى ميشا گلەننيدىڭ 2008 -جىلى شىققان «ماكمافيا: ۇيىمداسقان قىلمىس» كىتابىنىڭ جەلىسىمەن تۇسىرىلگەن.
قازاقستاندىقتار ءۇشىن بۇل پرەمەرانىڭ ءرولى ەرەكشە. سەبەبى سەريالدا مافيوزدىڭ ءرولىن قازاقتار سومداپ جاتىر.
تيمۋردىڭ رولىندەگى اكتەر ەردەن تەلەمىسوۆتىڭ ايتۋىنشا، قازاقستاندا كاستينگ بولماعان. وتكەن جىلدىڭ قاراشاسىندا ەردەنگە بەلگىلى سكريپكاشى مۇرات بيسەنعاليەۆ حابارلاسقان.
مۇراتتىڭ قىزى ارۋحان عاليەۆاعا McMafia جوباسىنىڭ كاستينگ ديرەكتورى ازيات ءناسىلدى ءۇش اكتەر تاۋىپ بەرۋىن سۇراعان.
پروداكشن ستۋدياداعىلار تەلەمىسوۆپەن كەزدەسكەن سوڭ ودان تاعى 2 بانديت تاۋىپ بەرۋىن سۇراعان.
وسىلايشا بريتان سەريالىنا مۇرات مۇقاشيەۆ پەن نۇركەن تۇماتايەۆ تۇسەتىن بولدى.
«نۇركەن بۇرىن كينوعا ءتۇسىپ كورمەگەن، جارنامالاردا عانا ويناعان. مۇرات ەكەۋمىزدىڭ ۆيدەولارىمىزدى كورىپ وتىرىپ، ولار كادرداعى نۇركەندى دە شاقىرتتى. العاشىندا سسەناريدى اعىلشىنشا جىبەردى. كەيىن ورىسشا جىبەردى»، - دەدى ەردەن تەلەمىسوۆ.
قازاقستاندىق اكتەرلەر سومداعان كەيىپكەرلەر سەريالدىڭ ءبىرىنشى سەرياسىندا بوي كورسەتەدى. ءۇشىنشى سەريادا ولاردىڭ ءبىرى عانا قالادى.
«ۇلى بريتانيادا ءتۇسىرىم پروتسەسى وتە جوعارى جاۋاپكەرشىلىكپەن وتەدى. وزگە ەلدىڭ اكتەرلەرىنىڭ دايىندىعىن كوردىك. ماسەلەن، الەكس گولدماندى سومداعان دجەيمس نورتون قۋعىننان كەيىن تۇسەتىن سسەنالارىندا 20 مينۋتتاي جاتتىعۋ جاسادى، كوزىنە ارنايى تامشىلار تامىزدى. سونىڭ ارقاسىندا كادردا شىنايى شارشاعان ادام بولىپ كورىندى»، - دەپ ەسكە الدى مۇرات مۇقاشيەۆ.
«كۇنتىزبەلىك جوسپاردا ءار مينۋتقا دەيىن الدىن الا ۇيىمداستىرىلدى. ءتۇسىرىلىم الدىندا اكتەرلەر الدىمەن رەجيسسەردىڭ الدىندا، ءتۇسىرىلىم توبىنىڭ الدىندا ويناپ كورسەتەدى. سوسىن ارىپتەستەرى كەمشىلىكتەرىن ايتقان سوڭ عانا موتور قوسىلادى»، - دەدى ەردەن تەلەمىسوۆ.
لوندوندا وتكەن 26 كۇننىڭ 5 كۇنى عانا ءتۇسىرىلىم جۇمىستارىنا ارنالدى.
«جارىقپەن جۇمىس جاساۋ تەحنولوگيالارى تاڭ قالدىردى. نورتونمەن تانىسۋ تۋرالى ستسەنا ءجۇرىپ جاتقان كەزدە تەك 1 عانا قۇرال بولدى. قالعان وبەكتيۆتەرگە جارىقتى باسەڭدەتەتىن فيلترلار قويىلدى»، - دەدى اكتەر.
اۆتور: گۇلميرا عوسمانالي
