بيىل قازاقستاندا باسپانا قۇنى قانشا بولادى

 استانا. قازاقپارات - ساراپشىلار اعىمداعى جىلى قازاقستاندا جىلجىمايتىن مۇلىك باعاسى قانشالىقتى قۇبىلاتىندىعىنا بولجام جاسادى، دەپ حابارلايدى قازاقپارات.

 ايتا كەتەرلىگى، وتكەن جىلى ەلىمىزدەگى جاڭا سالىنعان باسپانالاردىڭ باعاسى ءبىرشاما تۇراقتى بولىپ، ەكىنشى نارىقتاعى ۇيلەردىڭ باعاسى ايتارلىقتاي تومەندەگەن. ماسەلەن، ەلوردادا جاڭادان سالىنعان ۇيلەردىڭ شارشى مەترى جىل بويى 318 مىڭ تەڭگە توڭىرەگىندە بولدى. ال الماتىدا 430-450 مىڭ تەڭگە ارالىعىندا اۋىتقىپ وتىرىپ، جىلدىڭ سوڭىندا شامامەن 438 مىڭ تەڭگەنى قۇرادى. 2017 -جىلى ەكىنشى نارىقتاعى باسپانالاردىڭ باعاسى الماتى مەن استانادا ورتاشا ەسەپپەن 5,8 پايىزعا، ال كەيبىر وڭىرلەردە 10-11 پايىزعا دەيىن ارزاندادى.

وسى رەتتە قازاقستان ريەلتورلارىنىڭ بىرلەسكەن قاۋىمداستىعىنىڭ پرەزيدەنتى ەلەنا گريۆا 2018 -جىلى دا ەلىمىزدىڭ جىلجىمايتىن مۇلىك نارىعىنداعى باعانىڭ ايتارلىقتاي وزگەرىسكە ۇشىرامايتىندىعىن العا تارتادى.

«سوڭعى بىرنەشە جىل بويى باعانىڭ ماۋسىمدىق وزگەرىسكە ۇشىراۋى بولعان ەمەس. باعا سۇرانىستىڭ ەكونوميكالىق فاكتورلارىنا بايلانىستى وزگەرىپ وتىرادى. اتالعان فاكتورلاردىڭ دامۋ تەندەنتسياسىن قارايتىن بولساق، 2018 -جىلى جىلجىمايتىن مۇلىك باعاسى ايتارلىقتاي وزگەرمەيدى. الماتىدا وسى دەڭگەيدە قالادى نەمەسە جىلجىمايتىن مۇلىك ساتىپ الۋدى كەيىنگە قالدىرىپ وتىرعانداردىڭ ەسەبىنەن ازداپ كوتەرىلەدى. سونىمەن قاتار بۇل فاكتورلار مامىلەلەر سانىنىڭ وڭ ديناميكاسىنىڭ ساقتالۋىنا دا مۇمكىندىك بەرەدى. «استانا» حالىقارالىق قارجى ورتالىعىنىڭ جۇمىس ىستەي باستاۋىنا وراي ەلوردانىڭ جىلجىمايتىن نارىعىندا وڭ ترەندتەر بايقالدى» ، - دەدى ەلەنا گريۆا.

 ال قازاقستان ريەلتورلارىنىڭ بىرلەسكەن قاۋىمداستىعىنىڭ ۆيتسە- پرەزيدەنتى نينا لۋكيانەنكونىڭ دەرەگىنشە، 2017 -جىلدىڭ قاڭتار- قاراشاسىندا 2016 -جىلدىڭ سايكەس كەزەڭىمەن سالىستىرعاندا، ەلىمىزدەگى جىلجىمايتىن مۇلىك ساتىپ الۋ مامىلەلەرىنىڭ سانى 28,6 پايىزعا ارتىق بولعان.

«بۇل حالىقتىڭ تولەم قابىلەتىنىڭ ارتقاندىعىن بىلدىرە مە؟ مەنىڭشە، جوق. مامىلەلەردىڭ ءوسۋىنىڭ ءبىرىنشى سەبەبى ءوزىنىڭ باسپاناسىن جاقسارتۋدى جوسپارلاعانداردىڭ بايسالدىلىق تانىتۋى. وسى ۋاقىتقا دەيىن كوشىلىگى ۆاليۋتا باعامىن بايقاپ، پاتەر جانە ءۇي ساتىپ الۋعا اسىعا قويعان جوق» ، - دەدى ول.

ونىڭ ايتۋىنشا، قازاقستانداعى جىلجىمايتىن مۇلىك نارىعىنداعى مامىلەلەردىڭ شامامەن 70 پايىزى پاتەرلەرگە تيەسىلى. دەگەنمەن، بۇل كورسەتكىش الماتى مەن استانا قالالارىندا ايتارلىقتاي جوعارى بولىپ وتىر.

«استاناداعى مامىلەلەردىڭ 95 پايىزىن، الماتىدا 85 پايىزىن پاتەرلەر قۇرايدى. قالعان بولىگى جەكە تۇعىن ۇيگە تيەسىلى. ال قىزىلوردا مەن سولتۇستىك قازاقستان وبلىسىنداعى مامىلەلەردىڭ 30-40 پايىزىن پاتەرلەر، قالعان بولىگىن جەكە تۇرعىن ۇيلەر قۇرايدى» ، - دەدى نينا لۋكيانەنكو.