ونەر ادامدارى پارامەن ۇستالعان ەرلان ءبىلالعا اراشا ءتۇستى
بۇگىن وتكەن باسپا ءسوز ءماسليحاتىندا اتالعان وقيعاعا تەاتر ونەرىنىڭ وكىلدەرى ءوز پىكىرلەرىن ءبىلدىردى.
ونەر وكىلدەرى بۇل جاعدايدى ونەرگە جاسالعان قيانات دەپ ەسەپتەيدى.
«سوڭعى كەزدەرى الىپتى، بەرىپتى، قىلمىس جاساپتى دەگەندى عانا ەستيمىز. ال مەن ونى بىلەتىن اداممىن. ول كوز الدىمدا ءوستى. بىرەۋدىڭ الا ءجىبىن اتتاماعان. سەنگىش، ادال، اڭقاۋ بىرەۋلەردىڭ قۇيتىرقى ارەكەتىنىڭ قۇربانى بولىپ وتىر. ونەردە قۇبىلىس بولعان تۇلعانىڭ بۇل جاعدايى جانىمىزعا باتىپ وتىر. مۇنداي كەك الۋ، ءوش الۋ كىسىلىككە جاتپايدى. اعىن - اق، قاراسىن قارا دەڭدەر. ءبىز وتىرىك ايتاتىن جاستان كەتتىك»، - دەدى قازاقستان جازۋشىلار وداعىنىڭ ءتوراعاسى نۇرلان ورازالين.
ال قازاقستان تەاتر قاۋىمداستىعىنىڭ پرەزيدەنتى، حالىق ءارتىسى اسانالى ءاشىموۆ ەرلانعا پارا بەرگەن ازاماتتاردى دا جازاعا تارتۋدى سۇرادى.
«ەرلاننىڭ ادال ازامات، تازا جىگىت ەكەنىن حالىق ايتادى. وسىنداعى جاستار تۇنىمەن ۇيىقتاماي، ەرلاندى قورعاپ جىلى سوزدەرىن ايتىپ جاتىر. وسكەن ونگەن ەلدەردە ۇستاپ بەرگەن ادام دا جازالانادى. سوعىس جىلدارى ەلىن وتانىن ساتقان ادامداردى اتقان. ۇيىمداستىرعان ادامدى سوتقا شاقىرامىن»، - دەدى ءاسانالى ءاشىموۆ.
رەجيسسەر اسحات ماەميروۆ قۇقىق قورعاۋ ورگاندارىنا عانا تيەسىلى سۋرەتتەردىڭ ينتەرنەتكە قالاي تاراپ كەتكەنىنە تاڭدانىس ءبىلدىردى.
«ءبىز بۇل تۋرالى ساۋال جىبەرەتىن بولامىز. سۋرەتتەر تەك قانا تەرگەۋدە بولۋ كەرەك. سوت شەشىمىنەن سوڭ بەلگىلى بولۋى ءتيىس»، - دەدى ول.
ال كارىس تەاترىنىڭ ديرەكتورى ليۋبوۆ ني قانداي تەاترلاردىڭ عيماراتتى جالعا بەرۋگە قۇقىلى ەكەنىن ايتتى.
«ەگەر تەاتر مەملەكەتتىك بيۋدجەتكە قاراسا، جالعا بەرۋگە بولادى. ءبىراق جالاقىسى تۇگەل بيۋدجەتكە كەتەدى. ءبىراق مەن ءۇشىن تەاتر زالىن جالعا بەرۋ ءتيىمسىز. سەبەبى ونىڭ سۋى، جارىعى، دىبىسى دەگەن شىعىندار وتە كوپ. مەملەكەتتىك قازىناعا قاراعان تەاترلار شىعىندارىن جابۋ ءۇشىن جالعا بەرەدى. ول قىلمىس ەمەس. ءبىراق ول قارجى مەملەكەت بيۋدجەتىنە كەتۋى ءتيىس»، - دەدى ني ليۋبوۆ.
ونىڭ ايتۋىنشا، قازىر ەرلان ءبىلال دەنساۋلىعى سىر بەرىپ، ۇيىندە جاتىر.
ەسكە سالا كەتەيىك، الماتىدا م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى، بەلگىلى اكتەر ەرلان ءبىلال 1,5 ميلليون تەڭگە كولەمىندە پارا الىپ جاتقان جەرىنەن ۇستالعان بولاتىن.
اۆتور: گۇلميرا عوسمانالي
