14:14, 08 - قاڭتار 2018 | GMT +5
قىتايعا زاڭسىز التىن تاسىمالدايتىن قىلمىستىق توپ ۇستالدى - فوتو
استانا. قازاقپارات - زاڭسىز وندىرىلگەن التىندى كونتراباندالىق جولمەن قىتايعا شىعاراتىن قىلمىستىق توپ ۇستالدى، دەپ حابارلايدى قازاقپارات ۇ ق ك باسپا ءسوز قىزمەتىنە سىلتەمە جاساپ.
قازاقستان رەسپۋبليكاسى ۇ ق ك ۇزاق ۋاقىت بويى زاڭسىز وندىرىلگەن التىندى كونتراباندالىق جولمەن قىتايعا شىعارۋمەن اينالىسقان ۇيىمداسقان قىلمىستىق توپ ارەكەتىنىڭ جولىن كەستى.
«الماتى، استانا جانە ستەپنوگورسك قالالارىندا ارنايى وپەراتسيا جۇرگىزۋ بارىسىندا توپ مۇشەلەرى، ونىڭ ىشىندە قىتايدىڭ 1 ازاماتى ۇستالدى. «التىنكول» ستانتسياسىندا جالپى سالماعى 106 توننا التىندى كەنى بار 2 ۆاگون انىقتالدى. ولاردان جالعان قۇجاتتاما الىندى.
التىن كەنىن ساقتاۋ جانە قايتا وڭدەۋ ءۇشىن پايدالانعان قويما ءۇي-جايلارىنا ءتىنتۋ ءىس-شارالارى جۇرگىزىلدى. التىندى زەرتتەيتىن زاڭسىز زەرتحانا تابىلدى»، - دەلىنگەن باسپا ءسوز پاراعىندا.
وسى فاكت بويىنشا سوتقا دەيىنگى تەرگەۋ باستالدى، ءبىرقاتار ساراپتاما تاعايىندالدى.
