قۋاندىق بيشىمبايەۆ: مەن پرەزيدەنت الدىندا كىنالى ەكەنىمدى تۇسىنەمىن

استانا. قازاقپارات - مەملەكەت قارجىسىن جىمقىردى دەگەن ايىپقا ىلىككەن بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ پرەزيدەنت الدىندا ايىپتى ەكەنىن تۇسىنەتىنىن مالىمدەدى، دەپ حابارلايدى «قازاقپارات» ح ا ا ءتىلشىسى.

«مەن پرەزيدەنت الدىندا كىنالى ەكەنىمدى تۇسىنەمىن. مەن بىلەتىن، جۇمىسقا شاقىرعان ادامدار: جاقسىبايەۆ، جاقىپوۆ جانە باسقالار مەنىڭ سەنىمىمدى اقتامادى، ولار ءۇشىن مەن مەملەكەت باسشىسىنىڭ الدىندا جاۋاپتىمىن. بولىپ جاتقان بارلىق جاعداي ءۇشىن، پرەزيدەنتتىڭ ءۇمىتىن اقتاي الماعانىم ءۇشىن ۇيالامىن ءارى قينالامىن. كادر تاڭداۋدا قاتتى قاتەلەستىم. مەنى جانە مەنىڭ سەنىمىمدى پايدالانعان ادامداردى وزىمە تىم جاقىنداتىپ الدىم. مەن مەملەكەت باسشىسىنان، بۇكىل حالىقتان كەشىرىم سۇرايمىن»، - دەيدى بيشىمبايەۆ.

ەسكە سالا كەتسەك، 2017-جىلدىڭ 10- قاڭتارىندا سىبايلاس جەمقورلىققا قارسى ۇلتتىق بيۋرو بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ۇستالعانىن حابارلاعان بولاتىن. ۇلتتىق بيۋرودان ءمالىم ەتكەندەي، ول ءبىرقاتار اداممەن الدىن الا كەلىسىپ، ءىرى كولەمدە بىرنەشە مارتە پارا الدى دەپ ايىپتالۋدا.

بيشىمبايەۆ  قىزىلوردا قالاسىندا اينەك شىعاراتىن جانە وڭدەيتىن زاۋىت سالۋ بارىسىندا «Orda Glass» ج ش س- نىڭ ۆەدومستۆولىق باعىنىستاعى كومپانياسى مەن ونىڭ مەردىگەرلىك ۇيىمى «شىمكەنت حيممونتاج» ج ش س ارقىلى 1 ميلليارد تەڭگە جىمقىرۋ قىلمىستىق سحەماسىن ۇيىمداستىردى دەگەن كۇدىككە ءىلىندى.

وتكەن جىلدىڭ 12- قاڭتارى كۇنى استانا قالاسى الماتى اۋداندىق 2№ سوتى قۋاندىق بيشىمبايەۆقا قاتىستى ونى «قاماۋعا الۋ» تۋرالى سانكسيا بەردى. تەرگەۋ نۇسقاسى بويىنشا، بيشىمبايەۆ زاڭسىز جولمەن العان اقشالاي قاراجاتتارىن جەكە قاجەتتىلىكتەرىنە جۇمساعان.

اۆتور: ايان بەكەن ۇلى