جاڭا ماۋسىمدا «استانا ارلاندارى» كىمدەرمەن جۇدىرىقتاسادى؟
«WSB» جوباسىنىڭ رەسمي سايتى تاراتقان مالىمەتكە سۇيەنسەك، جاڭا ماۋسىمدا دوداعا 11 كوماندا قاتىسادى. كوماندالار قۇرلىقتار بويىنشا ءۇش توپقا ءبولىندى. جەرەبە تارتۋ ءراسىمى بويىنشا «استانا ارلاندارى» ازيا ايماعىنداعى توپتا قىتاي - «China Dragons»، ءۇندىستان جانە رەسەي - «Patriot Boxing Team» كومانداسىمەن كەزدەسەتىن بولدى.
ال امەريكا قۇرلىعى بويىنشا كۋبا - «Cuba Domadores»، ۆەنەسۋەلا - «Venezuela Caciques»، كولۋمبيا - «Colombia Heroicos» ءوزارا مىقتىنى انىقتاسا، ەۋروپا قۇرلىعى اراسىندا حورۆاتيا - «Croatian Knights»، فرانسيا - «Fighting Roosters»، انگليا - «British Lionhearts» جانە يتاليا - «Italia Thunder» قۇرامالارى ءوزارا سىنعا تۇسەدى. سوڭىندا ءار قۇرلىقتىڭ جەڭىمپازدارى ناعىز چەمپيوندى انىقتايدى.
ەندى، كوماندالار تۋرالى قىسقاشا توقتالا كەتسەك، «قىتاي ايداھارلارى» مەن «رەسەي پاتريوتتارى» بۇل جوبادا بۇعان دەيىن ونەر كورسەتسە، ءۇندىستاندىق كوماندانىڭ ءالى رەسمي اتى دا قۇرامى دا بەلگىسىز. ءۇندىستاندىق كلۋب بيىل جوباعا قاتىسۋدان تاس تارتقان «وزبەك جولبارىستارى» كومانداسىنىڭ ورنىن باسىپ وتىر. ال ەۋروپالىق كوماندالار اراسىندا جاڭادان حورۆاتيانىڭ كومانداسى قوسىلدى. امەريكا قۇرلىعىندا ارگەنتينا ەلىنىڭ كومانداسى جوق.
ەستەرىڭىزگە سالا كەتەيىك، «استانا ارلاندارى» - WSB جوباسىندا بۇل سەريانى ءۇش رەت جەڭسە، تاعى ءتورت رەت كۇمىس جۇلدەگەر اتاندى. ەكى رەت كۋبالىق بوكسشىلار توپ جارسا، فرانسيا مەن يتاليا كوماندالارى ءبىر-ءبىر رەتتەن جەڭىسكە جەتتى.
اۆتور: كۇنسۇلتان وتارباي
