تەگەرانداعى ازيا چەمپيوناتىندا كىمدەرگە ءۇمىت ارتا الامىز؟

استانا. قازاقپارات - جەڭىل اتلەتيكادان جاقىن ارادا وتەتىن ەڭ ءىرى حالىقارالىق جارىس دەپ، جابىق كەشەندەگى ازيا چەمپيوناتىن ايتۋعا بولادى.

ەلىمىزدىڭ جەڭىل اتلەتيكا قۇراماسى قازىرگى كەزدە وسى دوداعا دايىندالىپ جاتىر، دەپ حابارلايدى قازاقپارات ق ر جەڭىل اتلەتيكا فەدەراتسياسىنىڭ سايتىنا سىلتەمە جاساپ.

بيىل ازيا چەمپيوناتى 1-3- اقپان ارالىعىندا يران استاناسى تەگەران قالاسىندا وتەدى.

وعان دەيىن ۇلتتىق قۇراما مۇشەلەرى 8-21- قاڭتار ارالىعىندا وسكەمەن قالاسىندا جاتتىعادى. شىعىس قازاقستان وبلىسىندا سپورتشىلار ءۇش بىردەي جارىسقا قاتىسادى. الدىمەن 10-11- قاڭتار كۇندەرى قازاقستان كۋبوگىنا، 15-17- قاڭتار ارالىعىندا قازاقستان چەمپيوناتىنا جانە 20- قاڭتاردا وليمپيادا چەمپيونى رىپاكوۆانىڭ جۇلدەسىنە ارنالعان حالىقارالىق تۋرنيرگە قاتىسادى.

ازيا چەمپيوناتىنىڭ باعدارلاماسى

ەندى ازيا چەمپيوناتىنىڭ جارىس باعدارلاماسىنا توقتالساق. يراندا ەرلەر جانە ايەلدەر 13 سايىس تۇرىنەن سىنعا تۇسەدى. ياعني 60، 400، 800، 1500 جانە 3000 مەترگە جۇگىرۋ، 60 مەترگە توسقاۋىلدار ارقىلى جۇگىرۋ، 4x400 مەترلىك ەستافەتا، سەكىرۋدىڭ بارلىق تۇرلەرى (ۇزىندىققا، بيىكتىككە، ءۇش قارعىپ جانە سىرىقپەن سەكىرۋ)، يادرو سەرپۋ، بەسسايىس (ايەلدەر)، جەتىسايىستان (ەرلەر) مەدالدار ساراپقا سالىنادى.

كىمدەرگە ءۇمىت ارتا الامىز؟

60 مەترگە جۇگىرۋ - ەرلەردەن قاراعاندىلىق ۆلاديسلاۆ گريگوريەۆتىڭ، ايەلدەردەن ۆيكتوريا زيابكينانىڭ ءباسى جوعارى. اسىرەسە، زيابكيناعا ۇلكەن ءۇمىت ارتىلادى. ول بۇعان دەيىن جابىق كەشەندەگى ازيا چەمپيوناتى مەن ازيا ويىندارىندا جەڭىسكە جەتىپ ۇلگەرگەن. تاجىريبەسى مول. قىسقى ماۋسىمداعى جارىستارعا ۇلتتىق قۇرامانىڭ تاعى ءبىر كوشباسشىسى ولگا سافرونوۆا قاتىسا المايدى. ونىڭ ورنىن ريما كاشافۋتدينوۆا باسۋى مۇمكىن.

ايتا كەتەيىك، ءبىر سايىس تۇرىنەن ءاربىر مەملەكەتتەن 2 سپورتشى عانا قاتىسا الادى.

400 مەترگە جۇگىرۋ - سولتۇستىك قازاقستان وبلىسىنىڭ تۋماسى ميحايل ليتۆين قازىرگى كەزدە قۇرامانىڭ كوشباسشىسى. ول اشحابادتا وتكەن ازيا ويىندارىندا جەكە رەكوردىن جاڭارتتى - 46,51 سەكۋند. سونىڭ ارقاسىندا قولا جۇلدەگەر اتاندى.

ايەلدەردەن ەلينا ميحينا تۇرىكمەنستان استاناسىندا چەمپيون اتانعان بولاتىن. سوندىقتان قۇراما باپكەرلەرى ءبىرىنشى كەزەكتە ميحيناعا سەنىم ارتاتىن شىعار. ال ەكىنشى جولداماعا سۆەتلانا گولەندوۆا مەن يۋليا راحمانوۆا ۇمىتكەر.

 4x400 مەترلىك ەستافەتا - ايەلدەر قۇراماسىنان تەك باس جۇلدە كۇتىلەدى. قىزداردان قۇرالاتىن تورتىكتىڭ قۇرامىندا زيابكينا، ميحينا، گولەندوۆا، راحمانوۆا جۇگىرۋى ءتيىس.

ەرلەردەن قۇراما تولىق جاساقتالىپ ۇلگەرگەن جوق. نەگىزىنەن ميحايل ليتۆين، يگور كوندراتيەۆ، دميتري كوبلوۆ، اندرەي سوكولوۆ تورتتىگى نەگىزگى كانديدات دەپ ايتۋعا بولادى.

سەكىرۋ سايىسىنىڭ سەركەلەرى

2017-جىلى اشحابادتاعى ازيا ويىندارىنا ولگا رىپاكوۆا ءۇش قارعىپ جانە ۇزىندىققا سەكىرۋدەن قاتىسىپ، ەكى التىن جەڭىپ الىپ ەدى. ءبىراق بيىلعى قىسقى ماۋسىمداعى جارىستارعا وليمپيادا چەمپيونى قاتىسپايدى. دەگەنمەن تەگەراندا ءۇش قارعىپ سەكىرۋدەن التىن قازاقستان سپورتشىلارىنا بۇيىرۋى ءتيىس. ازىرگە ەكى ورىنعا ءۇش سپورتشى ۇمىتكەر. ولار - ماريا وۆچيننيكوۆا (قاراعاندى وبلىسى) جانە يرينا مەن ەكاتەرينا ەكتوۆالار (س ق و).

ال ۇزىندىققا سەكىرۋدەن 19 جاستاعى وۆچيننيكوۆا ونەر كورسەتۋى مۇمكىن. قاراعاندىلىق سپورتشى وتكەن جىلى ماۋسىم ايىندا جەكە رەكوردىن جاڭارتقان بولاتىن - 6,13 مەتر.

ەرلەردەن جۇلدە اكەلەدى دەپ سىرىقپەن سەكىرۋشى نيكيتا فيليپپوۆتى ايتۋعا بولادى. ول 2015-جىلى ۋنيۆەرسيادا ويىندارىندا چەمپيون اتانعان.

اشحابادتاعى ازيا ويىندارىنىڭ چەمپيونى سەرگەي گريگوريەۆ قىسقى ماۋسىمداعى جارىستارعا قاتىسپايدى.

يۆانوۆ - تۇرىكمەنستانداعى ناتيجەسىن قايتالاۋى ءتيىس

يادرو سەرپۋدەن 2017-جىلعى ازيا چەمپيوناتىنىڭ قولا جۇلدەگەرى، جابىق كەشەندەگى ازيا ويىندارىنىڭ چەمپيونى يۆان يۆانوۆ قىسقى ماۋسىمعا بەلسەندى دايىندىق جۇرگىزىپ جاتىر. ول ءۇش اي پورتۋگاليادا جاتتىعىپ كەلدى. ەندى ول تەگەراننان تەك باس جۇلدەمەن ورالۋى كەرەك.